Albin Kurti, faleminderit!

Nga Enxhi Hoxha

Portreti i qiellit mbi Kosovën tonë kombëtare, është identikiti i gjakut të miliona shqiptarëve që u dergjën për liri, që s’lejuan kurrsesi asgjesimin etnik, që s’përligjën cënimin e integritetit territorial të Kombit, që s’iu friguan akteve çnjerëzore të makabritetit serb, por frymën e fundit ia falën ëndrrës së Kosovës, idealit të lirisë! Sot, veriu i Kosovës është lajtmotivi i tryezave të diskurit politik, kryefjala e axhendës SHBA-BE, ku po lexohet paturpësisht favorizimi i interesave të Beogradit zyrtar, primitivëve të politikës moderne, kriminelëve shovinist, formacionit fashist, banditëve ekstremist! Tragji-komike të diskutohet ende, legjitimiteti fuqiplotë i sovranitetit të Kosovës. Faleminderit Albin Kurti, lideri i jetësimit të veprës sublime të dëshmorëve që u shuan si rreze drite, për t’i falur Kosovës diellin e përjetshëm! S’ka amnisti me historinë! S’ka kompromis me Kosovën!

Më 10 Dhjetor të 2022-shit, ishin partnerët ndërkombëtarë të SHBA-ve, ata që i kërkuan Kosovës shtyerjen e zgjedhjeve në veri të vendit, duke rekomanduar mbajtjen e tyre në Prill të këtij viti, vendim për të cilin u dakordësua edhe kryeministri Kurti. Pak ditë para mbajtjes së zgjedhjeve, SHBA-të i bën thirrje serbëve për t’iu adresuar kutive të votimit në elektoralet vendore, si dhe pohuan se do të njohin procesin zgjedhor dhe rezultatin e prodhuar, pra do të legjitimojnë kryetarët e zgjedhur në komunat respektive. Lista serbe, 10 ditë përpara datës elektorale, vendosi sabotimin e procesit zgjedhor, nën ultimatumin e Beogradit zyrtar.
Inskenimi serb ishte mëse i qartë, u kultivuan kushtet për destabilizimin e Kosovës dhe kërkohej më tej, me doemos preteksti i zbatimit të planit shovinist. Për këtë të fundit, strukturat vandale të Beogradit urdhëruan vendosjen e barrikadave në Kosovë dhe i atakuan fizikisht e verbalisht, kryetarët e rinj në detyrë, policinë e shtetit të Kosovës, si dhe vetë qeverinë Kurti. Skema eksibicioniste e Serbisë dukej e kuruar në detaje dhe rezultative, sipas tyre, por naiviteti çedoi kur s’kalkuloi lidershipin e Albin Kurtit, njeriut që s’tjetërson interesin e atdheut. Fermentimi i kultivimit te politikës serbe, është një filiz i gjymtuar përballë Albin Kurtit. Çdo deklaratë e tij publike, është inspirim dhe aspirim për jetëgjatësinë e tokës shqiptare, sepse askush përveç bijve të saj, nuk i shërben parimisht stabilitetit kombëtar. Europa, ka vulën e autorësisë së copëtimit të trojeve shqiptare, jemi i vetmi vend në botë i kufizuar me veten. Padrejtësia e shkuar, s’të bëhet drejtësi e re! Interesat e faktorit ndërkombëtar, shigjetojnë politika më largpamëse se sovraniteti i Kosovës, ndaj për ta s’është prioritet cënimi i integritetit territorial të veriut, por për ne duhet të jetë axhenda parësore. Në lokalet e 2019-ës në Shqipëri, ndodhi ekzaktësisht situata e veriut të Kosovës, SHBA-të përshëndetën procesin zgjedhor dhe i dhanë kredibilitet kryetarëve të rinj bashkiak, ndërsa në Kosovë kërkuan tejet paradoksalisht mosemërimin e të zgjedhurve. Dopio-standardet, s’ushqejnë terrene fair play! Albin Kurti, do të citohet në histori, si i pari lider që i dha dinjitet diplomacisë shqiptare, oponent i përdhosjes së autoritetit kombëtar, duke iu dëshmuar se jemi aleat të merituar e jo instrumente manipuluese, ushtarë të bindur qorrazi. Presioni i huaj e kërcënoi qeverinë Kurti me shkarkim, por qëndrimi i besnikëve të atdheut, s’ndryshoi, si kurrë më parë!

Veriu i Kosovës, është në një momentum historik që duhet të përqafojë e konstatojë kredibilitetin e mbarë popullit shqiptar. Koha e sotme, duhet të jetë shpërblim i misionit të dëshmorëve të rënë, krenarisë dhe lavdisë së secilit që i dorëzoi jetën vendit, lotëve të vajtimit e vuajtjeve të kobshme, të përjetuara për dinjitetin e pavarësisë së Shqiptarisë. Keqardhje, sesi përpos kastës politike opozitare të Kosovës e elementëve nga Shqipëria, që turpshëm atakojnë Kurtin, askush tjetër nuk reagon. Fatkeqësi kombëtare! Indiferenca vret! Të vetëquajtur “Vip”-a, që indinjohen për kauza globale të përtej Atlantikut, thjesht dhe vetëm për të qenë “in” në rrjete sociale, s’ia kanë idenë se çfarë rrjedhe po merr historia e vendit të tyre, sepse janë individë pa nivel, pa standard, pa vlera, pa arsim, janë dështim i kamufluar nën projektorët e famës. Qartësisht, nuk ka akses e kanalizim publik që të vesh mburojën e background-it të dijes, rrjedhimisht vitrina e injorancës nuk shet, nuk gjeneron, nuk revolucionarizon por stacionon shoqërinë. Ndaj, kjo e fundit duhet të zgjojë seleksionimin e “influencers” publikë, sepse injoranca nuk duhet të jetë zgjedhje kolegjiale, kjo do të rezultonte në regres emancipimi. S’di të them, si rrallëherë, nëse ky soj i shumimit teknologjik të “pseudo-vipave” apo gazetarët e financuar nga Serbia që atakojnë paturpësisht Kurtin, janë mjerimi më i rëndë, kafshata më e pakapërdishme.

Ne, shqiptarët, populli autokton i Ballkanit dhe ndër më të vjetrit e Europës, jemi vlerë e panegociueshme historike, por si të tillë lypset të operojmë. Ne kemi bekimin e Zotit, por duhet të kemi edhe të njëri-tjetrit! Vetëm vullneti e dashuria e pakompromistë për veten, do të jenë realiteti i Shqipërisë etnike, projektit më të bukur e më të vërtetë ne botë! E përjetshme qoftë Shqiptaria, njësoj si lavdia e dëshmorëve!