Të rinjtë nga e gjithë bota janë përfshirë në një trend të ri për Shqipërinë.
Siç shihet në këtë video të shpërndara masivisht në rrjetet sociale, me përshkrimin “Albania is calling”, “Shqipëria po të thërret”, të huajt tregojnë nisjen e udhëtimit drejt Shqipërisë nga aeroporti i vendit të tyre.
Gjithçka duket si një fushatë e re virtuale, që po promovon Shqipërinë. Popullaritetin e Shqipërisë në rrjete sociale e pohojnë edhe turistët e huaj në Tiranë.
“Jam nga Irlanda. Po bëjmë një tur në Ballkan, ishim më parë në Kroaci, Mal të Zi dhe tani këtu. Kam dëgjuar për historinë e Shqipërisë që dikur ka qenë një vend i izoluar. Tani është shumë i njohur në media. Kam lexuar artikuj të ndryshëm, por në rrjetet sociale është edhe më e njohur. Unë nuk kam tik tok, por në Instagram kam parë video të shumta që bëjnë ftesë për të vizituar Shqipërinë”, shprehet një turist.
“Ne postojmë në rrjetet sociale video të ndryshme, teksa jemi këtu me pushime. Një video të ngjashme si kjo e kam parë në Tik Tok dhe kishte marrë shumë shikime. Duken interesante dhe mendoj se kjo ndikon tek turizmi”, ka thënë një tjetër turiste.
Nga aeroportet deri tek përvoja në malet dhe plazhet e Shqipërisë, të rinjtë e huaj preferojnë të ndajnë çdo detaj të pushimeve në Shqipërisë në platforma të ndryshme.
“Jam nga Kina. Shqipëria është vend shumë i këndshëm, njerëzit janë miqësorë. Kam parë në internet shumë video nga Shqipëria, është shumë virale në rrjetet sociale. Unë kam Tik Tok dhe aty shoh shumë video, ndërkohë që jam këtu realizoj gjithashtu video dhe i publikoj në këtë platformë”, tha një turiste.
Por si po ndikon ky marketing i ri në promovimin e turizmit në vend?
“Sa më shumë influencues të huaj të vinë në Shqipëri, aq më shumë rritet pjesa e marketimit dhe numri i njerëzve për të ardhur në Shqipëri. Rrjetet sociale janë platformat që bëjnë marketingun më të madh, ne e kemi parë këtë që nga koha e pandemisë. Mediat social sot në gjykimin tim janë më të fuqishme se mediat tradicionale”, ka thënë Aneo Hila, operator turistik.
Agjencitë Turistike që operojnë në vend konfirmojnë se edhe marketingu i tyre është i përqendruar në rrjete sociale.
“Ne ndjekim njerëzit atje ku janë, nuk i bëjmë njerëzit të na ndjekin atje ku jemi. Kështu që ne ndjekim njerëzit në rrjetet sociale. Facebook është një platformë nga mosha më të mëdha. Pastaj grupmosha e Instagramit është një moshë e re në fillimet e profesioneve, këta janë e ardhmja, dhe gjenerata tjetër, janë fëmijët e këtyre të Facebook”, tha ai.
Grupet e të rinjve që vizitojnë Shqipërinë janë evropianët, ku dominojnë italianët dhe britanikët.
“Është një eksperiencë e këndshme për rininë, që duan të jetë aktive, pra që kanë të pranishëm edhe detin, jo të shkojnë vetëm në muze. Do ta krahasoja në fjalët e vizitorëve që Shqipëria është krahasimisht si Kroacia”.
