Kryetari i Bashkisë së Athinës, Haris Doukas, ka ngritur alarmin për pasojat e rritjes së pakontrolluar të turizmit në kryeqytetin grek, duke paralajmëruar se qyteti rrezikon të humbasë identitetin e tij. Në një intervistë për La Repubblica, ai deklaron: “Athina po bëhet një hotel gjigant. Kështu nuk mund të vazhdohet”.
Sipas Doukas, gjatë vitit 2025 Athina priti rreth 8 milionë turistë, një shifër shumë e lartë krahasuar me popullsinë prej vetëm 700 mijë banorësh. Ai thekson se zona si Plaka, pranë Akropolit, kanë përjetuar një dyfishim të vizitorëve, duke sjellë mbingarkesë në infrastrukturë dhe një rritje të ndjeshme të kostos së jetesës për banorët vendas.
“Pasojat nuk janë vetëm trafiku dhe rrëmuja në rrugë, por edhe rritja e çmimeve të banesave dhe largimi i banorëve nga qendra”, tha Doukas, përcjell A2. Ai shtoi se përhapja e qirave afatshkurtra përmes platformave si Airbnb dhe shtimi i pakontrolluar i lokaleve kanë transformuar qytetin në një destinacion të fokusuar më shumë te turizmi sesa te jeta e përditshme.
“Rrezikojmë të bëjmë të njëjtin gabim si Barcelona”, tha ai. Për këtë arsye, bashkia ka ndërmarrë masa konkrete për të frenuar këtë fenomen. “Kemi propozuar ndalimin e ndërtimeve të larta me pamje nga Akropoli dhe kufizimin e hapjes së bizneseve të reja në qendër”, shpjegoi ai.
Doukas theksoi gjithashtu rëndësinë e ruajtjes së ekuilibrit mes zhvillimit ekonomik dhe cilësisë së jetës. “Athina është për banorët e saj, jo vetëm për ata që duan ta shfrytëzojnë komercialisht”, u shpreh ai.
