Numila Kuneshka, shefe e Kardiologjisë Pediatrike në QSUNT, ngriti alarmin në emisionin “Aldo Morning Show” në Tv Klan, mbi rritjen e konsumit të pijeve energjike tek fëmijët dhe adoleshentët. Ajo tha se është shqetësuese që në vendin tonë konsumimi i pijeve energjike shihet që tek fëmijët e moshës 6-vjeçare.
Mjekja tha një kanoçe me pije energjike është e barabartë me tre kafe, ose dy ekspres, që do të thotë se sasia e kafeinës në pijet energjike është tejet e lartë. Sipas saj sasia e lartë e kafeinës, jep shqetësime kardiovaskulare, rrahje të shpejta të zemrës, të cilat kalojnë deri në aritmi.
“Shohim që është shtuar numri i adoleshentëve dhe fëmijëve të të gjitha moshave, edhe në moshën 6 vjeç që konsumojnë pije energjike. Është shtuar numri i prezantimeve të tyre në urgjencat pediatrike dhe në urgjencat e kardiologjisë pediatrike. Pijet energjike kanë disa elemente që janë të dëmshme për moshën pediatrike dhe për moshën e adoleshentëve. Pijet energjike kanë një përmbajtje më të lartë kafeine se sa vetë kafeja. Një kanoçe me pije energjike është e barabartë me katër kafe filtri, ose dy kafe ekspres. Kjo kafeinë më e rritur natyrisht që do të japë shqetësime kardiovaskulare, që prezantohet me rrahjet e shpejta të zemrës. Mund të kenë aritmi, rrahje të çrregullta të zemrës. Vijnë në urgjencë me këto shqetësime”, u shpreh Kuneshka.
E pyetur nga moderatori Aldo në lidhje me moshën e fillimit të konsumit, ajo tha ka pasur raste të konsumimit që në moshën 6-vjeçare. Lidhur me këtë mjekja Numila Kuneshka tregon rastin e një fëmijë të mitur që erdhi në urgjencë me tensionin e lartë, 18 me 12.
“Në moshën e pubertetit, që nga 9, 10 vjeç, kurse 11-12-13 vjeç është piku i pubertetit për vajzat dhe djemtë. Tek vajzat dhe djemtë shohim njësoj konsumimin e pijeve energjike. Është ulur mosha e disa viteve më parë të fëmijëve që prezantohen në urgjenca që prezantohet me këto çrregullime, me rrahje të shpejta të zemrës, me tensione të rritura. Erdhi para disa ditësh një fëmijë 15 vjeç me tensionin 180 me 120, ose siç thotë populli 18 me 12. Kjo kishte ardhur si pasojë e konsumimit, sepse vetë tha se kishte konsumuar dy kanoçe me pije energjike dhe prezantohet tek ne me këtë shifër të tensionit arterial, që është alarmante.”
Kur Aldo sugjeroi se fëmija mund të ketë pasur probleme të mëparshme shëndetësore, Kuneshka u shpreh se nga analizat nuk rezultoi asnjë problem kardiovaskular që lidhej me zemrës. Shkaku kryesor rezultoi të ishte konsumi i pijeve energjike që vetë fëmija e pati pranuar.
“Ishte një fëmijë me zemër normale. Nuk ishte një fëmijë me efekte të lindura të zemrës. Ishte vetëm nga konsumimi i pijeve energjike. Bëri ekzaminimet dhe nuk kishte arsye të tjera kardiake, renale e të tjera dhe shkaku ishte vetëm konsumimi i pijeve energjike.”/
