Autoritetet turke kanë ngritur alarm pas zhdukjes së biznesmenit të njohur Halit Yukay, i cili është i zhdukur që prej mbrëmjes së së shtunës, kur u nis me jahtin e tij “Graywolf” nga qyteti bregdetar i Yalovës me destinacion ishullin e në Greqi.
Pak orë më vonë, jahti luksoz u gjet i dëmtuar rëndë dhe gjysmë i mbytur pranë ishullit Prokonisos në Detin e Marmaras, nga rojet bregdetare turke. Alarmi u dha nga familjarët e Yukay, të cilët humbën kontaktet me të menjëherë pas nisjes së udhëtimit.
Roja bregdetare turke u njoftua zyrtarisht në orën 23:40 të së hënës. Të nesërmen, rreth orës 14:30 pasdite, një anije tregtare raportoi se kishte dalluar mbetje të një anijeje në det të cilat më vonë u identifikuan si pjesë e jahtit “Graywolf”.
Në operacionin e kërkimit janë angazhuar një helikopter, anije të rojës bregdetare dhe zhytës profesionistë, por deri më tani nuk është gjetur asnjë gjurmë e biznesmenit 43-vjeçar.
Kush është Halit Yukay
Halit Yukay, i lindur në vitin 1982, është themeluesi dhe pronari i kompanisë turke Mazu Yachts, e specializuar në ndërtimin e jahteve luksoze. Ai e nisi karrierën e tij si punëtor në kantierë detarë dhe, me përkushtim, arriti të themelonte kompaninë e tij në vitin 2011. Mazu Yachts është e njohur në Turqi për dizajnet moderne dhe teknologjitë e avancuara që aplikon në ndërtimin e mjeteve lundruese.
Autoritetet po vazhdojnë kërkimet, ndërsa ende nuk ka informacione nëse në bord ndodhej dikush tjetër përveç Yukay.
