Më shumë se 100 persona në një anije turistike janë infektuar pas një shpërthimi të norovirusit, duke detyruar autoritetet të vendosin në karantinë pasagjerët dhe anëtarët e ekuipazhit të prekur.
Sipas Qendrave Amerikane për Kontrollin dhe Parandalimin e Sëmundjeve (CDC), 102 pasagjerë dhe 13 anëtarë të ekuipazhit në anijen “Caribbean Princess” kanë shfaqur simptoma gastrointestinale dhe janë izoluar nga pjesa tjetër e udhëtarëve.
Anija, në pronësi të kompanisë Princess Cruises, u nis më 28 prill nga Porti Everglades në Fort Lauderdale të Floridës dhe pritet të ankorohet më 11 maj. Aktualisht ajo ndodhet pranë brigjeve veriore të Republikës Dominikane dhe parashikohet të mbërrijë në Nassau, në Bahamas.
Princess Cruises konfirmoi rastet, duke deklaruar se personat e prekur kanë shfaqur “simptoma të lehta gastrointestinale”. Kompania shtoi se të gjitha zonat e anijes janë dezinfektuar menjëherë dhe janë shtuar masat e pastrimit gjatë gjithë udhëtimit.
Sipas CDC-së, në bord ndodheshin 3,116 pasagjerë dhe 1,131 anëtarë ekuipazhi. Norovirusi, i njohur shpesh si “virusi i të vjellave dimërore”, është një virus shumë ngjitës që shkakton të vjella dhe diarre. Simptomat zakonisht zgjasin rreth dy ditë. Ngjarja vjen në një kohë kur një tjetër anije turistike, MV Hondius, po përballet me një shpërthim të hantavirusit. Pasagjerët britanikë në bord po transportohen me helikopter drejt Tenerife-s, ku do t’i nënshtrohen testeve përpara riatdhesimit në Mbretërinë e Bashkuar.
Autoritetet britanike kanë organizuar fluturime speciale riatdhesimi dhe masa të rrepta shëndetësore për pasagjerët, ndërsa disa persona po trajtohen në Holandë, Afrikën e Jugut dhe ishullin Tristan da Cunha pas shfaqjes së simptomave të lidhura me hantavirusin.
