Biznesmeni shqiptar Edevaldo Haxhiu, i cili u prangos dy ditë më parë pasi akuzohet se ka ndihmuar të arratisej milionerin e kriptomonedhave, Faruk Fatih Özer, është liruar nga qelia. Vendimi është marrë sot në seancën paraprake, ku Haxhiu ishte vetë prezent.
Prokurori Bledar Valikaj kërkoi ndryshimin e masës së sigurisë për Haxhiun nga “arrest me burg” në “arrest shtëpie”, gjë që është pranuar nga Gjykata e Tiranës.
Vetë Haxhiu nuk i pranoi akuzat duke deklaruar se të shumëkërkuarin Faruk Ozer nuk e njeh fare dhe se madje s’e ka takuar asnjëherë.
“Nuk e njoh, nuk e kam takuar kurrë,”- ka thënë Haxhiu.
Edevaldo haxhiu u vu në pranga dy ditë më parë. Lajmin e bënë me dije mediat turke fillimisht, të cilat publikuan edhe pamje ku biznesmeni shqiptar shihej që kishte transportuar turkun e shumëkërkuar nga hoteli në Rinas, në një tjetër destinacion.
Boss-i i kriptomonedhave turke, dyshohet se ndodhet në Shqipëri, duke iu fshehur autoriteteve turke. Ai akuzohet se përmes kompanisë së tij, Thodex, mashtroi mijëra turq që kanë investuar paratë e tyre, rreth 2 miliardë dollarë në monedhat virtuale.
Më pas, ai shpalli falimentin e kompanisë, bëri mbylljen e ndihmën e motrës së tij dhe u arratis drejt Shqipërisë. Më 20 prill ai ka mbërritur në Shqipëri përmes një bilete që bleu në Air Albania. Në Turqi, janë lëshuar në total 82 urdhër arresti, përfshirë atë për Ozer.
Më herët për të njëjtën çështje është vënë në pranga edhe shqiptari Altjan Canaj, që dyshohet gjithashtu se ndihmoi Ozerin.
/m.j
