Pas akuzave për plagjiaturë, zëvendësministri i Arsimit Ervin Demo ka paraqitur sot dorëheqjen e tij. Lajmin e ka bërë të ditur vet Demo përmes një statusi në ‘Facebook’.
Demo tha se; “Çdo argumentim nga ana ime kundër baltosjes në pozicionin që jam sot, do të paragjykohej vetiu dhe do linte vend për keqinterpretime, nëse unë do të mbetesha në pozicionin tim”.
REAGIMI I DEMOS
Gjatë 2 javëve të fundit jam vënë në shënjestër nga politika e baltës dhe besoj se në radhë të parë më takon të vë interesat e kabinetit qeveritar mbi interesin tim personal. Unë i jam thellësisht mirënjohës Kryeministrit për mbështetjen e Tij të pakushtëzuar, të Ministres së Arsimit, Rinisë dhe Sporteve po ashtu, si edhe të gjithë atyre që ma bënë kaq sfiduese, dinamike e të bukur pse jo, këtë fazë të karrierës sime.
Sot kam ofruar dorëheqjen si zëvendësministër dhe mbetem i përkushtuar në vijimin e përpjekjes sonë të përbashkët, si qytetarë e si veprimtarë të Partisë Socialiste.
Çdo argumentim nga ana ime kundër baltosjes në pozicionin që jam sot, do të paragjykohej vetiu dhe do linte vend për keqinterpretime, nëse unë do të mbetesha në pozicionin tim.
Besimi e mbështetja e deritanishme, më mjaftojnë e teprojnë kur thotë populli. Besoj fort që koha do t’i vërë më shpejt se vonë gjërat në vend dhe unë do të jem në pozicionin e duhur për ta ndihmuar këtë proces.
Ministria e Arsimit, Sportit dhe Rinisë, ka disa muaj që po përgatit fillimin e “Verifikimit të kritereve të ligjshmërisë” (VKL) për të gjithë titujt dhe gradat e akorduara nga IAL-të në vend, gjatë 10 viteve të fundit.
Nuk do të dëshiroja kurrë që në pozicionin e zëvendësministrit, të isha une vetë arsyeja për ta paragjykuar këtë element kaq të rëndësishëm të reformës sonë rrënjësore. Proçese të tilla transparente, rigoroze dhe të drejta, janë rruga e vetme për të krijuar një qasje të re në sistem për arsimin që aspirojmë dhe kontribuar në kulturën e duhur organizative në promovimin e stafeve akadamike dhe kërkuesve të rinj.
Do të jetë tejet e vështirë, po pikërisht për këtë arsye jam sot më i bindur se kurrë që vetëm nën drejtimin aktual, të Kryeministrit Rama dhe Partisë Socialiste që reformat jetike për vendin, do të vijojnë të ecin me vendosmëri në drejtimin e duhur.
Për mua ka qenë një privilegj të kem qenë pjesë e kabinetit Rama. Tanimë do të jem i tëri në dispozicion të veprimtarisë sime politike mes njerëzve të zakonshëm.
Shumë faleminderit dhe mirënjohje e respekt të gjithë kolegëve të kabinetit.
KUSH ËSHTË ERVIN DEMO
Lindur në Berat, në vitin 1982.
Ka ndjekur studimet e larta Bachelor dhe Master në Mbretërinë e Bashkuar.
Në vitin 2010 fitoi titullin “Doktor” nga Universiteti i Tiranës me temë “Menaxhimi i Krizave”. Studimet post doktorale i ka ndjekur në Universitetin e Bolonjës, “Matja e Performancës në Arsimin e Lartë: Harmonizimi i Strategjive me Nevojat e Territorit”. Z. Demo mban titullin “Profesor i Associuar”.
Që nga viti 2004, ka qenë pedagog me kohë të plotë pranë departamentit të Menaxhimit, në Fakultetin e Ekonomisë, Universiteti i Tiranës. Ndërkohë ka mbajtur pozicione të ndryshme drejtuese në UT. Gjatë 2012-2016 ka qenë Zv. Rektor i Universitetit të Tiranës për Kërkimin Shkencor dhe Marrëdhëniet me Jashtë.
Z. Ervin Demo ka qenë gjithmonë aktiv në çështjet që lidhen me arsimin a lartë dhe në iniciativa që lidhen me Sipërmarrjen dhe Inovacionin. Ai është përfshirë në Reformën e Arsimit të Lartë dhe Kërkimit Shkencor, si anëtar i komisionit i cili hartoi ligjin e arsimit te larte i miratuar në 2015. Ka përkthyer tekste universitare të cilat përdoren në institucionet e arsimit të lartë, si dhe ka kryer redaktime shkencore. Gjithashtu, numëron një pjesëmarrje të gjerë në konferenca të shumta shkencore brenda dhe jashtë vendit.
Z. Demo ka përvojë të gjerë në koordinimin e projekteve Evropiane, si ato të programeve Tempus, Erasmus Mundus, Erasmus +, IPA, etj.
ma.me
