Aktakuza ndaj Hashim Thaçit nga Gjykata Speciale është një proces tërësisht politik. Kështu u shpreh ish zv.ministrja e Jashtme, Edith Harxhi, mbrëmjen e së premtes në studion e emisionit “Java në RTSH”.
Harxhi shtoi se nuk është e pazakontë që sa herë ka ngjarje të mëdha në SHBA, ka krizë në Kosovë.
“Kjo aktakuzë ka një prapavijë politike dhe e dëmton imazhin e Kosovës. Nuk dua të hyj në konspiracione por kjo është situata më e ndërlikuar në Kosovë që prej mbarimit të luftës. Unë uroj të mos kalohet në një krizë më të madhe se kjo. Kërkohet diçka shumë e vogël që ne shqiptarët shpesh e harrojmë. Kërkohet patriotizëm për të ruajtur identitetin e shtetit dhe për të mos rënë preh e atyrë që mendojnë se Kosova nuk mund të performojë më si shtet” – tha Harxhi.
Ndërkohë për ish-ambasadorin Fatos Tarifa, drejtësia nuk është vënë ende në Kosovë. Ai shtoi se ngjarjet në SHBA nuk kanë ndonjë lidhje me krizën aktuale në Kosovë.
“Nuk mendoj se po tentohet të ketë një spastrim të klasës politike në Kosovë. Ne shqiptarët nuk kemi ndonjë rol në vendimet e drejtësisë ndërkombëtare ndaj nuk besoj se bëhet fjalë për ndonjë komplot. SHBA ka bërë shumë për ne. Vetë shteti i Kosovës është krijim i amerikanëve, ashtu si Izraeli” – tha ish-ambasadori Tarifa në studion e emisionit ‘Java në RTSH’.
