Llogaritja ekonomike e vendosjes së sistemit të matjes është kryer mbi bazën e analizave të punimeve të mbështetura në manualet teknike, atë të çmimeve të referencës dhe ato zyrtare. Ndërkohë që deklarata e Partisë Demokratike është e shoqëruar me mungesa të theksuara profesionalizmi dhe duket dukshëm se është e përgatitur nga persona të cilët nuk kanë lidhje me objektin e vërtetë të kësaj kontrate.
Objekti i kësaj kontrate qëndron në instalimin e sistemit të matjes 1-fazore dhe 3-fazore në klientët pa matje apo me matje jashtë kushteve teknike, ku kontraktori merr përsipër të bëjë:
- Furnizimin të gjithë aksesorëve të nevojshme për instalimin e sistemit të matjes me përjashtim të vetë matësit dhe boksit individual.
- Instalimin e të gjithë komponentëve të sistemit të matjes përfshirë matësin dhe boksin sipas kushteve teknike të OSHEE dhe standardeve europiane që garantojnë gjithë këtë proces.
Pra, sqarojmë se nuk kemi të bëjmë me instalim të thjeshtë matësi, por e të gjithë sistemit të matjes me të gjithë elementet e sigurisë teknike dhe të garantimit të cilësisë së procesit konform rregullave, kodeve dhe ligjeve në fuqi.
Gjithashtu, pretendimi i opozitës se matësit po instalohen nga punonjësit e OSHEE nuk qëndron, pasi ky investim është duke u kryer me të tretë sipas të gjitha rregullave dhe ligjeve në fuqi, ku OSHEE është pjesëmarrëse vetëm në mbikëqyrjen dhe garantimin e kryerjes së procesit me cilësi sipas të gjitha standardeve.
Theksojmë se ky tender është zhvilluar në muajin shkurt, me procedura prokurimi elektronike transparente ku nuk është regjistruar asnjë ankesë.
