Ministria e Brendshme ka reaguar pas deklaratave të Partisë Demokratike në lidhje me trafikun ndërkombëtar të drogës. Në një deklaratë për mediat, kreu i Departamentit për Sigurinë në PD, Enkelejd Alibeaj u shpreh se “4 ton drogë janë kapur në dy ditët e fundit në Itali, drogë e mbjellë, e magazinuar, e transportuar nga Shqipëria”.
Nga ana e saj, Ministria e Brendshme shprehet se ato që PD i reklamon si dështime, janë suksese të policisë dhe fryt i bashkëpunimit me aleatët.
“Lidhur me deklaratën e mbajtur sot nga një zyrtar i PD, ku ndër të tjera thuhej se gjatë dy ditëve të fundit në Itali janë kapur rreth 4 ton drogë të ardhur nga Shqipëria, Policia e Shtetit bën me dije opinionin publik se këto qe PD i reklamon si dështime, janë suksese të policisë dhe fryt i bashkëpunimit mes strukturave policore të të dy vendeve. Bashkëpunim që nuk ka ekzistuar më parë e që sot është në nivele të shkëlqyera. Së pari, PD del sot në deklaratë për shtyp ndërkohë qe operacioni është zhvilluar para 2 javësh në datë 26 nëntor“, thuhet në deklaratën e Ministrisë së Brendshme.
MB sqaron se vetë Policia Italiane e thotë qartë në deklaratë bashkëpunimin e Policisë Shqiptare në operacionin antidrogë.
“Operacioni ka nisur sapo Autoritetet e Policisë shqiptare, nëpërmjet Nuklit Detar të Guardia di Financës me bazë në Durrës, kanë njoftuar për praninë e një mjeti të dyshimtë që drejtohej për nga brigjet italiane”. Për PD, po përkthejmë komunikatën zyrtare të Policisë italiane nga italishtja në shqip, duke besuar se PD nuk do të fshihet pas përkthimit siç bëri për ligjin e Vettingut. Deklarata e autoriteteve italiane saktëson që në hyrje se informacioni është dhënë nga Policia e Shtetit, çka përbën konfirmim të bashkëpunimit të frytshëm mes strukturave policore të të dy vendeve. PD bën mirë të heshtë, meqë nuk përgëzon dot sukseset e bashkëpunimit ndërmjet Policisë dhe partnerëve. Policia e Shtetit ngelet e hapur për të ofruar çdo informacion zyrtar kujtdo që është i interesuar të dijë të vërtetën dhe të mos e keqpërdorë atë”, thuhet më tej në deklaratën e Ministrisë së Brendshme.
ma.me
