Presidenti i skuadrës së Kukësit Safet Gjici, u vu ditën e sotme nga PD në qendër të akuzave lidhur me përfitime nga paratë publike në mënyrë abuzive. Ishte deputeti i PD-së, Ervin Salianji, që doli nga selia blu me dokumente që, sipas tij, provojne se Gjici ka përfituar më shumë se 25.2 mln dollarë nga dy kompanitë e tij.
Por vetëm disa orë pas këtyre akuzave, ka reaguar vetë Gjici, ku përmes një statusi të gjatë në Facebook, ka paralajmërua deputetin e PD-së se këtë çështje do t’a ndjekë në gjyq, duke i cilësuar gënjeshtra pretendimet e tij.
Reagimi Gjicit:
“Me teorinë “shpif, shpif se diçka do mbetet”, Salianji sot doli dhe gënjeu shqiptarët.
I gënjeu, se gjoja unë paskam fituar tendera “marramendës”!!!!
Ervin, je i gabuar!
Që në kohën kur u emërova Prefekt i Qarkut Kukës, në vitin 2014, nuk menaxhoj më asnjë kompani. Kjo dihet botërisht, por ti dhe ata që të nxorën sot nuk dinë apo duan të shohin!
Kjo është e vërteta.
Lidhur me kompanitë e cituara, të sugjeroj të informohesh, pasi fjalët e tua janë të gabuara dhe të siguroj se do të hidhen poshtë dhe nga drejtësia.
Për shpifjen tënde të radhës, që në fakt është e përhershmja përpara çdo beteje elektorale, do të takohemi në Gjykatë, aty ku e vërteta do triumfojë.
Sa i përket tenderave, kompanitë që unë drejtoja dikur, kanë përfitur me konkurim të ndershëm më shumë gjatë qeverisjes së Partisë Demokratike. Kjo është lehtësisht e verifikueshme në buletinet publike. Mjafton ti shohesh!”
