Nga foltorja e Kuvendit, deputeti socialist Erion Braçe, replikoi akuzat e kryedemokratit Sali Berisha për skemën e fermerëve. “Fjalët që thuhen këtu duhet të kenë edhe logjikë. Është gjëja më e mirë që duhet të funksionojë në Parlament”, tha ai me ironi.
Megjithatë, kaloi pa nxitim te ngjarja tragjike e Durrësit.
“Dy familje përcollën pa kthim shpirtin e tyre. Kush ka fëmijë e di fare mirë se çfarë do të thotë të përcjellësh shpirtin tënd. Një i treti ishte në betejë për jetën, e tani me një traumë mbi të gjitha emocionale e mentale. Një krim, vrasje me dashje për mua dhe asnjëherë aksident apo shkelje e rregullave të qarkullimit rrugor. Një ngjarje e përsëritur!”
Sa i takon publikimit të pamjeve bruto të aksidentit nga vetë ai, argumentoi:
Ashtu siç ndodhi, thellësisht real, me një arsye: refuzimin për ta normalizuar një krim të tillë!
“Një i pirë, për më keq një i dehur, ndalohet, shoqërohet, dërgohet në paraburgim. Thuajse në çdo rast është liruar pas dy ditësh”, shtoi Braçe duke kritikuar mënyrën si procedohet nëpër komisariate.
