Policia e Shkodrës po heton rrëzimin e avionit në Vermosh duke ngritur akuzën e “Cenimit të hapësirës ajrore” dhe “Kalimit të paligjshëm të kufirit”, por pa emra konkretë.
Burime të Tv Klan pranë grupit hetimor thanë se një nga dyshimet kryesore të grupit hetimor është përdorimi i këtij mjeti fluturues për trafik të narkotikëve.
Rrëzimi avionit pa asnjë shenjë dalluese dhe pa asnjë dokument në bord dyshohet të ketë ardhur për shkak të një avarie të krijuar. Grupi hetimor ka marrë një sërë dëshmish të banorëve të zonës të cilët kanë treguar se disa çanta janë marrë nga avioni me anë të makinës tip fuoristradë ngjyrë e bardhë.
Për shkaqet e rrëzimit do të ketë edhe një akt ekspertimi teknik, ndërsa veprimet e tjera do të kryhen nga Prokuroria. Kjo e fundit po pret rezultatet e verifikimeve që po kryhen nga Kosova dhe Mali i Zi për të zbuluar itinerarin që ka ndjekur avioni.
Shoferi i tij dhe pasagjeri dyshohet të jenë futur në territorin malazez në mënyrë ilegale. Dyshimet për trafik narkotikësh dhe veprimtari të paligjshme shtohen për shkak se vetëm pak minuta nga rrëzimi, në vendin e ngjarjes ka mbërritur një tjetër shtetas me makinë.
Ata nuk kanë lejuar banorët e zonës të afrohen edhe kur u është ofruar ndihmë./m.j
