Zv.kryeministrja, njëherësh Ministrja për Infrastrukturën dhe Energjinë, Belinda Balluku ka komentuar nga Kuvendi hetimin e nisur për të nga SPAK në lidhje me Tunelin e Llogarasë.
Balluku deklaroi se nuk do të prononcohet asnjëherë për çështje të cilat janë në hetim, ndërsa shtoi se drejtësia e re e dalë nga reforma, po kryen misionin e saj. Ajo kundërshtoi kategorikisht të ndalej në sulmet e opozitës kundrejt saj.
Balluku theksoi se Partia Socialiste mbështet plotësisht reformën në drejtësi.
“Dua të them disa fjalë që ia kam borxh mijëra qytetarëve. Jo për të kompensuar baltën, aludimet, gjysmë të vërtetat apo gënjeshtrat e thëna me bollëk. Por për detyrimin që kam ndaj kujtdo. Nuk do dëgjoni kurrë nga unë, akuza sharje e as kërcënime për drejtësinë e re, edhe kur prekem personalisht.
As lëvdata e himne pasi besoj thellësisht se kjo drejtësi e re e dalë nga reforma, produkt i vullnetit të PS dhe Ramës është duke kryer misionin për të cilën u reformua, me pikat e saj të dobëta e të forta. Por si gjithçka e re konsolidohet dita-ditës. Nuk do më dëgjoni kurrë të merrem me prokurorë e gjyqtarë, pasi secili prej bën detyrën ashtu si e gjykon., Nuk do prononcohem kurrë për çështjen nën hetim sepse ato kanë rrugën e tyre të cilën do e ndjek me diskrecion të plotë, derisa e vërteta të marrë formë të prerë cilado qoftë ajo. Por, unë si gjithë kolegët e mi të PS mbështesim reformën në drejtësi. Dhe po të prekemi personalisht, pasi ndryshe nga sa thoni e mendohet, PS është një formacion politik serioz, i vetmi në Republikë, ku fjala e secilit dëgjohet e ka peshë. Ajo reformë ka marrë mbështetjen e çdo socialisti. Ndaj nuk kam asnjë koment”, tha Balluku.
Prokuroria e Posaçme kundër Korrupsionit dhe Krimit të Organizuar (SPAK) njoftoi më 31 tetor 2025, ngritjen e akuzës penale ndaj Ministres në detyrë të Infrastrukturës dhe Energjisë, Belinda Balluku.
Akuza specifike është për veprën penale “Shkelje e barazisë së pjesëmarrësve në tendera apo ankande publike”, parashikuar nga neni 258 i Kodit Penal, në bashkëpunim (nenet 258/2 dhe 25 i KP).
