“Shqipëria pati një goditje të rëndë të orkestruar nga një grup i strukturuar për të penguar hapjen e negociatave”, – deklaroi sot Kryeministri Edi Rama.
I ftuar në Real Story, Rama tha se “ajo goditje e rëndë krijoi tkurrje ekonomike, një situatë shqetësimi, pasigurie dhe neverie te qytetarët dhe e plagosi vendin”.
“Tani flasim për një proces rikuperimi ku kemi shumë e shumë gjëra për të bërë dhe halle për të adresuar. Kemi kapërcyer një pengesë të madhe të ngritur artificialisht pikërisht nga ai grup i strukturuar përmes dezinformimit, manipulimit dhe ushqimit të një pjese të klasës politike gjermane me gjithçka që keni parë në 6 muaj”, – tha Rama.
Rama tha se “ata bënë çmos që të përdornin miqtë e tyre në Bundestag për t’i dhënë fund çeljes së negociatave”. “E kemi kapërcyer, unë, ne dhe Bundestagu ka thënë ‘Po’, të çelen negociatat për Shqipërinë. Kjo është themelore. Kjo do të ishte shumë më e lehtë po të ishim së bashku”, – tha Rama.
“PSD ka dashur hapjen e negociatave pa kushte. Të Gjelbrit e duan pa kushte dhe pjesa e shumicës në qeveri CDU/CSU me të cilët kam komunikuar në mënyrë intensive dhe kam arritur të shpërndaj një pjesë të madhe të tymit nga këta, ka kapërcyer ylberin duke iu përgjigjur pozitivisht, jo mua, por Kancelares së Gjermanisë, e cila ka thënë që duhet t’i japim ‘Po’ Shqipërisë. Do të kishte qenë shumë më patriotike, më shqiptare dhe e arsyeshme që Ilir Meta dhe këta të tjerët të kishin bërë xhiron e Europës dhe të kërkonin hapje të negociatave. Por dolën kur e kanë marrë vesh që projekti i tyre vdiq në Berlin”, – tha Rama.
