Pas denoncimeve të shumta në media për sigurinë ushqimorë të produkteve që tregtohen në tregjet shqiptare, qytetarët tregojnë një interes më të lartë për ato që konsumojnë.
Gjithashtu lajmet që flasin për sigurinë ushqimore janë shumë të lexuara tashmë në portale.
Në faqen e saj zyrtare në internet, Autoriteti Kombëtar i Ushqimit, ka bllokuar dhe ka kthyer në vendin e origjinës, 375 kg kafe nga Kosova dhe 21.6 ton qumësht pluhur nga Serbia.
Bllokimi është bërë në pikën kufitare të Morinës. Sipas AKU-t, kafesë i kishte mbetur afat përdorimi më pak se gjysma (1/2) e jetëgjatësisë ndërsa importuesi i qumështit nuk ishte i licencuar për shitje./l.m
NJOFTIMI I AKUT-t:
Autoriteti Kombëtar i Ushqimit vijon me rigorozitet kontrollet e ngarkesave me mallra ushqimore në Pikat e Inspektimit Kufitar, me qëllim parandalimin e praktikave të paligjshme nga Operatorët e Biznesit në të gjithë zinxhirin ushqimor dhe marrjen e masave për parandalimin e pasojave shëndetësore tek konsumatorët. Kështu AKU, nga kontrollet e kryera në Pikën e Inspektimit Kufitar Morinë ka bllokuar dy ngarkesa produktesh me kafe dhe qumësht pluhur.
Nga kontrolli i ushtruar në një ngarkesë me 375 kg “Kafe Espresso D-CAFFE”, nisur nga Kosova me qëllimin për t’u tregtuar në Shqipëri, inspektorët e AKU-së gjatë kontrollit në kufi kanë konstatuar se produktit “Kafe Espresso D-CAFFE” i kishte mbetur afat përdorimi më pak se gjysma (1/2) e jetëgjatësisë. Për rrjedhojë, nuk plotësonte kërkesat ligjore të parashikuara në pikën 2 të Urdhërit Nr.250, datë 29.07.2011 “Mbi disa masa për hyrjen në territorin e Republikës së Shqipërisë të produkteve ushqimore” dhe si e tillë nuk ishte e përshtatshme për konsum.
Në bazë të legjislacionit në fuqi, AKU nuk lejoi futjen e këtyre produkteve në territorin e Republikës së Shqipërisë, ngarkesa me këtë produkt ushqimor u kthye në vendin e origjinës.
Nga kontrolli i ushtruar në praktikën e importit të një ngarkesë me 21,600 kg qumësht pluhur, nisur nga Serbia me qëllimin për t’u tregtuar në Shqipëri, inspektorët e AKU-së në kufi kanë konstatuar se importuesi “ITAL GEL” nuk është i licencuar për shitje me shumicë të ushqimeve me origjinë shtazore për konsum human (nuk ka licencën përkatëse për aktivitetin me Kod II-1B).
Në bazë të legjislacionit në fuqi, AKU mori marrën masa administrative “Bllokim” të sasisë prej 21.6 ton qumësht pluhur, me urdhër kthimin e produktit në vendin e origjinës.
