Dy javë nga nisja e aksionit për ndërprerjen e lidhjeve të paligjshme të ujit të pijshëm, si pjesë e reformës kombëtare të ujit, në të gjithë kryeqytetin janë verifikuar më shumë se 1400 subjekte private biznesi.
Grupet Task-Force me ndihmën e Policisë së Shtetit, Policisë Bashkiake dhe stafit teknik të Ujësjellës-Kanalizimeve të Tiranës, kanë vijuar aksionin në terren për verifikimin dhe ndërprerjen e të gjitha rasteve të lidhjeve të paligjshme nga bizneset, me qëllim përmirësimin e situatës së furnizimit me ujë të pijshëm në kryeqytet. Çdo ditë grupet e Task-Forcës kryejnë një numër të madh verifikimesh në teren, ndërsa në 25 raste subjektet shkelëse të ligjit janë shoqëruar në polici.
Falë këtij aksioni që për Bashkinë e Tiranës ka nisur që në muajt e verës, por edhe fushatës sensibilizuese në sportelet e UKT-së lidhen afërsisht 2500 kontrata të reja çdo muaj.
Ndërkohë ajo që ka rëndësi për konsumatorët familjar është se mbeten afërsisht edhe 10 ditë që ata të mund të bëjnë lidhjen e kontratës me UKT duke formalizuar kështu lidhjet e paligjshme të ujit.Kjo pasi prej datës 1 Mars do të nisë aksioni i verifikimit edhe për të gjithë abonentët privat familjarë dhe të gjithë ata që kanë një lidhje të paligjshme uji përveç prerjes së saj, do të përballen dhe me masat ligjore.
