Grupi Parlamentar i Partisë Demokratike vendosi pasditen e kësaj të hëne që në seancën e Kuvendit të mbeshtesë kërkesat e paraqitur nga organet e Vettingut dhe të miratohen ashtu siç i kanë paraqitur.
Më herët, komisioni i ligjeve rrëzoi kërkesat e komisionerëve për paga të larta deri në 1 milionë lekë në muaj si dhe benefite të tjera, për të ushtruar detyrën konform ligjeve dhe kushtetutës. Demokratët nga ana e tyre u shprehën në mbështetje të drejtuesve të organeve të Vettingut, ndërsa një qëndrim të tillë pritet ta mbajnë edhe gjatë seancës plenare të ditës së enjte.
Selia blu pritet të paraqesë në seancë amendamente për këtë çështje.
Gjithashtu, demokratët do cekin gjatë diskutimeve në Kuvend edhe importin e mbetjeve. Sipas vendimit që është marrë sot në mbledhjen e grupit parlamentar, deputetët e opozitës do kërkojnë llogari për mosrespektimin e rregullores dhe vonesat me diskutimin e dekretit të Presidentit për rishqyrtimin e ligjit që parashikon importin e mbetjeve.
Do të nisë thirrja e ministrave të dikastereve kryesore, e paralamëruar që në fillim prej demokratëve. Ndër të cilët edhe ministrja e Arsimit Lindita Nikolla lidhur me problemet me Arsimin dhe ato për tekstet shkollore që vazhdojnë dhe këtë vit shkruan Shqiptarja.
Ndërkohë, një nga çështjet e cila gjithashtu do marrë vëmendje të gjerë nga politika, reforma zgjedhore, demokratët kanë nisur punën për hartimin e platformës e cila do t’i dorëzohet Kuvendit./a.m.
