Familjarët e 17-vjeçarit Kristi Panajoti, që humbi jetën pasi makina tip “BMV-X6” që drejtohej nga kushëriri i tij i parë ra në një gropë të hapur në mes të rrugës në aksin Skelë-Uji i Ftohtë, shprehen të revoltuar për deklaratën e policisë së Vlorës, në të cilën theksohej se mjeti “doli nga rruga dhe ra në një kanal”.
Familjarët thonë se djali i tyre dhe kushëriri i tij ishin duke ecur në rrugë të drejtë, ndërsa gropa ishte hapur në mes të saj. Duke shtuar errësirën dhe mungesën e sinjalistikës që të tregonte hapjen e një grope, familjarët akuzojnë firmën ndërtuese, por edhe policinë për deklaratën.
Kujtojmë se Kristi Panajoti ishte djali i biznesmenit të njohur në fushën e Transportit, Renato Panajoti. Aksidenti ku ai humbi jetën ndodhi mbrëmjen e djeshme rreth orës 23:50, në lagjen “Ujë i ftohtë”, kur automjeti tip “BMV-X6” me targë AA 010 AU, ra në në një gropë. Dy të rinjve iu dha ndihma mjekësore, por me të shkuar në spital, pasagjeri Kristi Panajoti humbi jetën.
NJOFTIMI I POLICISË:
Rreth orës 23:50, në lagjen “Ujë i ftohtë” ka ndodhur një aksident rrugor me pasojë vdekjen e një personi.
Policia pasi ka shkuar në vendngjarje ka konstatuar se në aksin Ujë i ftohtë – Skelë, automjeti tip “BMV-X6” me targë AA 010 AU, ka dalë nga rruga dhe ka rënë në një kanal.
Për pasojë kanë marrë dëmtime të rënda drejtuesi i mjetit, shtetasi P.B., 21 vjeç, banues në Vlorë, bashkë me një pasagjer, të cilët u dërguan menjëherë në Spitalin e Vlorës, por rreth orës 00:05, Spitali ka konfirmuar humbjen e jetës së pasagjerit.
Policia ka identifikuar viktimën me gjeneralitetet K.P., 17 vjeç, banues në Vlorë.
Grupi hetimor ndodhet në vendngjarje duke kryer veprimet e mëtejshme hetimore për sqarimin e rrethanave të aksidentit.
BW/d.i.
