Ministria e Shëndetësisë ka hedhur poshtë, përmes një deklarate, lajmet se ambulanca nuk është dukur në vendngjarje pas aksidentit të rëndë në Kamzë mbrëmë, ku vdiq një polic dhe u plagosën dy të tjerë. Deklarata, e shoqëruar si dhe në raste të tjera me gjurmimin GPS të ambulancës, thotë se mjeti i urgjencës ka mbërritur 12 minuta pas marrjes së thirrjes.
Ja deklarata:
Në shkrimin me titull “VIDEO TRONDITESE/ Aksidenti ne Kamez, Policët e gjakosur luftojnë për jetën, ambulanca nuk duket askund,” të botuar sot (26/09/2016) në portalin informativ online “360grade.al” raportohet se autoambulanca e shërbimit të urgjencës mjekësore është vonuar, dhe për më tepër, sipas raportimit në fjalë “nuk dukej askund”, për t’i ardhur në ndihmë një shtetasi në vendodhjen përballë përballë gjimnazit “Ibrahim Rugova” në Kamëz, Tiranë.
Siç edhe mund të verifikohet fare lehtësisht nga dokumentacioni i shërbimit të urgjencës dhe gjurmimi elektronik nëpërmjet sistemit GPS të aktivitetit të lëvizjes në terren të autoambulancës “TR 9916 K Urgjenca e Tiranës”, thirrja për t’i ardhur në ndihmë personit në nevojë është marrë nga centrali i shërbimit të urgjencës mjekësore në orën 21:15 dhe orari i mbërritjes së autoambulancës te vendodhja e personit në nevojë shënon kohën 21:27.
Pra, siç mund të shihet qartësisht, autoambulanca ka mbërritur në vendngjarje për 12 minuta, krejtësisht ndryshe nga çka raportohet në shkrimin e sipërpërmendur.
