Pavarësisht rasteve kur aksidenti është me pasojë vdekjen ose plagosje e rëndë, Kodi Rrugor nuk parashikon sanksione të tjera për drejtuesit e makinave. Ekspertit rrugor Gëzim Hoxha, thotë në një intervistë për Report TV se shoferët mund të ndiqen penalisht për aksidentet, ndërsa patenta u hiqet maksimumi deri më 1 vit.
“Një drejtues mjeti ka përgjegjësi penale ka dhe një kundravajtje administrative që ka tejkaluar normat e shpejtësisë. Për të dyja këto ka dy gjykime të ndryshme. Një e ka gjykata dhe një e ka Komisioni i Kundravajtjeve Penale. Heqja e patentës mund të jetë deri një vit”, u shpreh Hoxha.
Pasi u hiqet patenta në rast se shkelin kodin rrugor, apo shpallen fajtor në aksidente shoferët janë të detyruar që të bëjnë një kurs teorik pranë autoshkollave.
“Por marr rastin që është shpejtësia e tejkaluar. Për këtë shpejtësi drejtuesi i mjetit parashikon që e ka kaluar dy herë normën e shpejtësisë, atëherë parashikohet që patenta duhet t’i hiqet për 6 muaj, atëherë Komisioni vendos heqjen e tij për 6 muaj. Por këto janë rast pas rasti. Nuk ka raste të precizuara që çdo njeri që bën aksident duhet t’u hiqet patenta 1,2 apo 3 vite. Këta njerëz duhet të trajnohen, pra duhet të futen edhe një herë në kurs për të marrë patentën sepse këtyre u hiqen pikë nga patenta sipas rastit që ata kanë shkaktuar kundravajtjen administrative”, deklaroi për Report TV Hoxha.
Sipas të dhënave të Policisë së Shtetit në vit ndodhin më shumë se 50 aksidente me pasojë vdekjen, ku fajtor janë shpallur drejtuesit e makinave. Gëzim Hoxha thekson se duhen masa më të rrepta për shoferët që vrasin në rrugë.
“Kur drejtuesi i mjetit shpallet fajtor nga Gjykata që merr edhe dënimin duhet patjetër që këta njerëz duhet të kenë sanksione shumë të forta sepse tregojnë që këta njerëz janë të pa qëndrueshëm, që mund ta përsërisin” shprehet Hoxha.
Nga amnistia shumë prej personave që janë arrestuar për shkak të aksidenteve janë liruar. Ata tashmë vetëm me një kurs mund të rimarrin patentën.
