Një aksident tragjik është shënuar në orët e para të së enjtes në ishullin e Kretës, ku dy të rinj shqiptarë kanë humbur jetën pas një përplasjeje të rëndë të motorit me të cilin po udhëtonin.
Ngjarja ka ndodhur rreth orës 03:00 në Rrugën Kombëtare pranë zonës Kolymbari, në Hania, ku një motoçikletë me të cilën udhëtonin dy persona, 28 dhe 34 vjeç, ka dalë nga rruga dhe është përplasur me barrierat mbrojtëse.
Si pasojë e përplasjes së fortë, të dy shqiptarët kanë humbur jetën në vendngjarje. Një ambulancë e EKAB mbërriti në zonë, por ndërhyrja e ekipeve mjekësore ishte e pamundur për t’i shpëtuar dy të rinjtë.
Një dëshmitar okular, i cili kaloi pranë vendit të aksidentit, tregoi për ERT Chania momentet dramatike pas përplasjes:
“Motocikleta ishte ende duke lëvizur, ndërsa helmetat e dy të rinjve ishin hedhur disa metra larg, njëra prej tyre e dëmtuar. Telefonova menjëherë shërbimet e emergjencës dhe një ambulancë mbërriti shumë shpejt nga Kolymbari. Ekipet e shpëtimit nisën ndërhyrjen sipas procedurave, ndërsa vetëm pak minuta më vonë mbërriti edhe një ambulancë tjetër nga Kasteli, së bashku me një mjek.”
Policia Rrugore greke ka nisur hetimet për zbardhjen e plotë të rrethanave të aksidentit dhe shkaqeve që çuan në daljen e motoçikletës nga rruga.
https://euronews.al/njeri-nga-elbasani-tjetri-nga-gramshi-keta-jane-dy-shqiptaret-qe-humben-jeten-ne-aksidentin-tragjik-me-motor-ne-krete
