Akademiku Gjovalin Shkurtaj e ka cilësuar si shembullor procesin e vaksinimit masiv që po kryhet në Tiranë.
“Dje, në ditën e dytë të vaksinimit masiv të të moshuarve në Sheshin “Skënderbej” të Tiranës, ashtu si qindra të tjerë, bashkë me time shoqe, Leonorën, kishim radhën e caktuar për ta kryer vaksinimin. Përshtypjet më të mira për organizimin e përsosur të regjistrimit dhe të plotësimit të dokumentacionit përkatës, mirësjellje dhe kujdes i jashtëzakonshëm për t’i shoqëruar të moshuarit deri në sallën e vaksinimit dhe, gjithandej, një pamje e radhë pune, gatishmërie dhe shërbimi të qytetëruar”, shprehet gjuhëtar i mirënjohur me kontribute disavjeçare në sociolinguistikë, Shkurtaj.
Shkurtaj shprehu mirënjohje për organizatorët.
“Përgëzojmë dhe u shprehim falënderime të ndjera organizatorëve, që nga mjekja e familjes, të gjithë punonjësve të përfshirë në këtë shërbim human e shumë të rëndësishëm, po edhe urimin e çiltër që kjo frymë rregulli e sjelljeje të kulturuar të jetë si model e shembull për t’u ndjekur kurdoherë në vendin tonë”, tha Shkurtaj.
Shkurtaj po ashtu apeloi qytetarët të vijojnë të respektojnë rregullat që parandalojnë përhapjen e virusit.
“Le ta bëjmë, pra, vaksinimin dhe të vazhdojmë edhe më tej respektimin e të gjitha rregullave, në mënyrë që ta përballojmë e ta tejkalojmë sa më shpejt e sa më mirë këtë pandemi të frikshme e mizore, që po na merr jetë njerëzish edhe të moshave të reja”, deklaroi ai./ b.h
