Në Akademinë e Filmit dhe Multimedias “Marubi” në Tiranë do të zhvillohet të merkuren një aktivitet në homazh të aktorit të madh me famë botërore, Bekim Fehmiu. Aktiviteti organizohet nga Akademia e Filmit dhe Multimedias Marubi, Arkivi Qendror Shtetëror i Filmit dhe Instituti Shqiptar për Studime Ndërkombëtare.
Për artdashësit do të shfaqet filmi “Bekim Fehmiu në Shqipëri” me regji të Vitori Çeli, prodhuar nga Kinostudio “Shqipëria e re 1972” . Filmi është një kronikë mbi vizitën ne Shqipëri të artistit kosovar Bekim Fehmiu.
Takimet e tij me njerëz të artit e kulturës si dhe udhëtimet nëpër qytetet shqiptare si Krujë , Durrës, Sarandë e Gjirokastër, por edhe në veprat industriale ndiqen nga kamera e Bardhyl Martinianit për t’u fiksuar më pas në celuloid.
Pjesë e aktivitetit është edhe prezantimi i monografisë për jetën e Bekim Fehmiut “Odiseu i Kosovës” nga Fahri Musliu, bën të ditur në një njoftim për shtyp Akademia e Filmit dhe Multimedias “Marubi” .
Aktori Bekim Fehmiu ka lindur më 1 qershor të vitit 1936 në Sarajevë. Ka kryer fakultetin e arteve dramatike në Beograd. Ka qenë një nga personalitetet që ka lënë gjurmë në kinematografinë ballkanike, por mbi të gjitha, ai është i madh për kontributin artistik në kinematografinë botërore.
I martuar me një artiste serbe, ai ishte nga ata që nuk e braktisi në asnjë moment Beogradin dhe nuk iu tremb të qenët shqiptar.
Shqipërinë e ka vizituar në vitin 1972 dhe nuk e ka fshehur kurrë mallin që kishte për të. Ndër dhjetëra filmat që ka luajtur, rolet e tij në “Prova Speciale”, “Odiseja”, “Aventurieri”, “Rruga”, “Vitet e Nxehta”, “Dezertori”, përmenden si kryevepra.
Bekim Fehmiu ishte një nga legjendat e kinemasë, duke i dhënë vetes rastin të prek Hollivudin, por mbi të gjitha duke na dhënë ne shqiptarëve shansin e madh që ta kishim atë. Një aktor që kurrsesi nuk mohoi origjinën e vet, madje përkundrazi e lartësoi atë në kinematë më të mëdha të botës.
Ai ka bashkëpunuar me Xhon Hjustonin, Olivija de Hevilland, Ava Gardner, Robert Shou, Fernando Rej, Dirk Bogart, Sharl Aznavur, Irene Papas, Klaudia Kardinale, Kendis Bergen etj. Bekim Fehmiu ka interpretuar në shqip, serbisht, maqedonisht, turqisht, në gjuhën rome, në spanjisht, anglisht, frëngjisht dhe italisht.