Ministri Financave, Arben Ahmetaj, ka hedhur poshtë sot në Kuvend, deklaratat e ish- kryeministrit Berisha, lidhur me situatën e rëndë ekonomike në vend. Sipas Ahmetajt është vetë Banka e Shqipërisë ajo që rrëzon pretendimet e Berishës.
“Analizat dhe vlerësimet tona tregojnë se reduktimi i inflacionit në këto muaj i atribuohet goditjeve të ofertës. Të shprehura në rënien e inflacionit të çmimeve të ushqimeve të papërpunara, të naftës dhe të produkteve të lidhura me të. Analizat dhe vlerësimet tona sugjerojnë një natyrë kalimtare të goditjeve të ofertës, inflacioni pritet të rritet gradualisht në gjashtëmujorin e dytë të vitit duke qendruar në nivelin 1.9% në fund të tij”, ka deklaruar Ahmetaj.
Sipas tij, goditja e ofertës nuk ka të bëjë me konsumin, por me importimin e kostove të ulëta, se shqiptarët paguajnë sot më pak.
“Kërkesa e brendshme vijoi rritjen në tremujorin e katërt të vitit, e mbështetur nga zgjerimi i investimeve dhe konsumit privat. Konsumi privat përshpejtoi rritjen në tremujorin e katërt, duke u rritur në terma vjetorë 2.1%. Zhvillimet pozitive në tregun e punës, lehtësimi i kushteve të kreditimit dhe rritja e fuqisë blerëse të të ardhurave të disponuara, vlerësohen të jënë faktorët nxitës për rritjen e shpenzimeve familjare. Konsumi privat vlerësohet të jetë rritur edhe gjatë tremujorit të parë 2016”, citon Ahmetaj raportin e Bankës.
Ministri i Financave akuzon ish kryeministrin Berisha se duke mbjellur zi, duke i trembur shqiptarët, konsumatorët, bizneset, investitorët, do të vijë në pushtet.
“Qeverise në zi dhe e çove vendin në kulmin e varfërisë në 2012. Nuk ka më pushtet në zi në Shqipëri, dy herë rresht ta thanë mbi 1 milionë shqiptarë me votë, tani është koha ta marrësh seriozisht popullin”, i është drejtuar ai Berishës.
ma.me
