Deputeti i Partisë Republikane, flet për drejtimin e PD nga Basha dhe shkaqet e humbjes në Durrës
Për deputetin e Partisë Republikane Agron Duka qeverisja aktuale nuk mund të quhet të suksesshme. Sipas tij, Kryeministri Edi Rama nuk po mban premtimet që ka dhënë para se të vinte në pushtet. Në një intervistë për “Koha Jonë”, Duka ka komentuar dhe raportin e “konfidencial” të OSBE-së. Ai thotë se raporti është hartuar mbi bazë thashethemesh. “. Është një papërgjegjshmëri e madhe kur ky institucion shprehet se raporti është “kofidencial” për përdorim të brendshëm dhe në fakt publikohet në media. Edhe sikur të ishte një individ i zakonshëm duhet të mbante përgjegjësi për një veprim të tillë e jo më një institucion si OSBE, sepse shpifje të tilla cenojnë rëndë imazhin e individit. qoftë ky politikan apo jo”,- shprehet Duka.
Z. Duka, keni shprehur indinjimin tuaj për raportin e OSBE dhe cilësimin tuaj si person i lidhur me krimin dhe bandat kriminale?
Natyrisht që jam i indinjuar, e para sepse OSBE ka pranuar që i është referuar artikujve të gazetave dhe informacioneve jo zyrtare, dhe e dyta jam prekur padrejtësisht. Është një papërgjegjshmëri e madhe kur ky institucion shprehet se raporti është “kofidencial” për përdorim të brendshëm dhe në fakt publikohet në media. Edhe sikur të ishte një individ i zakonshëm duhet të mbante përgjegjësi për një veprim të tillë e jo më një institucion si OSBE, sepse shpifje të tilla cenojnë rëndë imazhin e individit. qoftë ky politikan apo jo. Në këtë raport unë përmendem për evazion fiskal dhe lidhje me banda kriminale, akuza qesharake pa asnjë bazë por që nuk janë të reja për mua. Këto akuza dikur kur unë kam qenë Ministër i Bujqësisë 2001-2005 më janë bërë nga zoti Berisha. Besoj ju kujtohen etiketimet e tij të asaj kohe si “Duka i krimit”, “Klani i Zemunit”, etj. Koha tregoi që këto akuza ishin të pabaza dhe politike. Megjithëse unë jam shkëputur nga politika aktive nga 2005 deri me 2013 asgjë nuk u vërtetua. Më habit fakti që OSBE gjatë hulumtimit në media nuk ka mbledhur ata që thuhen për mua dhe tim vëlla, Armand Duka (ortakun e vetëm). Nuk duhet shumë vëmendje për të parë që ne të dy vëllezërit jemi qytetar nderi të Shijakut ,Tepelenës, Gjirokastrës, etj. Vëllai im, President i FSHF-së, drejton me shumë sukses këtë institucion dhe për herë të parë Shqipëria në futboll arrin të renditet e 22-ta në botë. Nëse vazhdojmë mund të flasim gjatë për këtë pyetje por unë po e mbyll duke i uruar ekipit kombëtar të futbollit pjesëmarrje në Kampionatin Europian 2016.
“Gjella me kripë e kripa me karar”, jeni shprehur ju për Z.Erion Veliaj, si i shikoni muajt e parë në detyrë të tij?
Unë jam shprehur shumë sinqerisht dhe shpresoj të më ketë mirëkuptuar, sepse qëllimi im ka qenë të ndikoj për mirë. Sipas meje, një detyrë e tillë si kryetar bashkie apo ministër e ka të domosdoshme daljen në media, por kur kjo bëhet vend e pavend krijon bezdi dhe ka efekt të kundërt. Natyrshëm njerëzit mendojnë që “këta” e kanë mendjen të reklamojnë punën e tyre dhe jo të bëjnë punë efektive. Unë, mendoj që njerëzit i prekin çdo ditë ato që realizohen siç ndjejnë mungesën e atyre që nuk bëhen. Prandaj, dalja në media duhet të bëhet atëherë kur duhet për ti shërbyer punës e jo për tu dukur. Daljet e Erionit në media, sipas mendimit tim, vazhdojnë të jenë të ekzagjeruara.
Thonë që bukën e tjetrit nuk e han dot, a mund ta lidhim edhe me humbjen e PD-së në Durrës pasi ofertës suaj për të kandidat për Bashkinë e Durrësit nuk u pranua?
Opozita në zgjedhjet vendore në Durrës ka qenë e bashkuar dhe nuk ka qenë kjo arsyeja e humbjes. Unë jam shprehur për këtë edhe më parë. Sipas mendimit, tim zgjedhjet në Durrës nuk kanë qenë të lira dhe në pozita të barabarta. Grida ishte një kandidaturë shumë e mirë, por nuk mund ti bënte ballë blerjes masive te votave si edhe presioneve ndaj administratës të bëra nga kundërshtari.
Z. Duka, si po qeveris Edi Rama?
Mendoj që nuk është e suksesshme, nuk po mbahen premtimet që u bënë në 2013-ën për shëndetësi falas, zhvillim modern rural, etj. Ekonomia vazhdon të lëngojë dhe largimi masiv i njerëzve është një fenomen negativ. Ka një përpjekje pozitive për formalizimin e ekonomisë, por kjo, sidomos në bujqësi, duhet të shoqërohet me subvencione, ndryshe nuk mund të realizohet.
Është Berisha duke eklipsuar Bashën, dhe a ka opozita njeriun e duhur për të drejtuar një partinë?
Berisha është në vendin e vet. Ai është aktiv si deputeti më me eksperiencë i PD-së si dhe zëri më protagonist i saj, ndërsa Basha po bën realisht rolin që i takon si kryetari aktual i Partisë Demokratike.
Si e komentoni qëndrimet e Presidentit mbi kthimin e ligjeve për rishqyrtim në kuvend?
Presidenti ka bërë detyrën e tij. Ai ka kthyer në Kuvend ligjin për Turizmin dhe Arsimin duke argumentuar se përse këto dy ligje duhet të rishikoheshin. Ajo që bëri Kuvendi, për mendimin tim, ishte gabim duke e kaluar edhe njëherë për votim pa asnjë ndryshim. Duket qartë që maxhoranca dhe institucioni i Presidentit e shohin njëri-tjetrin kundërshtar dhe kjo e dëmton cilësinë e ligjeve. Fakti që për ligjin për arsimin pati protesta nga studentët dhe pedagogët tregon se maxharonca nuk kishte të drejtë dhe do ishte mirë të merrte parasysh përmirësimet e bëra nga Presidenti, i cili duket qartë që ishte konsultuar me grupet e interesit.
Si a është kështu momentalisht situata midis aleatëve PS-LSI?
PS dhe LSI po qeverisin së bashku, unë si anëtar i opozitës i shoh të dyja bashkë. Lopë për tu mjelë, aktualisht është populli sipas meje..
