U bënë disa ditë që çeshtja e kandidatit për bashkinë e Durrësit, mori një zgjidhje të padëshiruar për ju dhe PR-në. Si ndjeheni, pas gjithë asaj zhurme?
Natyrisht si fillim nuk u ndjeva mirë, sepse ishte krijuar një frymë optimiste në elektorat dhe e perceptova të padrejtë argumentin që duke qenë se Durrësi është bashkia e dytë për nga rëndësia pas Tiranës, kandidati duhet të jetë patjetër nga partia më e madhe e bllokut opozitar. Sipas konceptit tim nuk duhet të kishte rendësi pesha specifike në këtë marrëdhënie partneriteti, por zgjedhja e një kandidati që premtonte fitoren.
Megjithatë unë premtova që, në se PD-ja nxjerr një kandidat me parametra të cilat ngjallin shpresa për fitore do ti kërkojë PR-së të mbështesim kandidaturën e përbashkët. Me daljen znj. Grida Duma mendimi i përgjithshëm është se opozita ka shanse të mëdha për fitoren e bashkisë prandaj edhe unë i kam bërë thirrje strukturave të PR-së si dhe dashamirësve të mijë të mbështesim kandidaturën e saj.
Në këto momente që po flasim unë ndjehem shumë mirë sepse kemi bërë disa takime së bashku me znj. Duma dhe po ndjehemi gjithnjë e më të sigurt në fitoren për të cilën po luftojmë të gjithë, ky optimizëm sjell natyrshëm zëvendësimin e ndjesive negative me pozitivitet, përveç kësaj për vetë natyrën time unë ndjehem shumë mirë kur të tjerët ndjehen mirë dhe këtë ndjesi po e shohim jo vetëm në elektoratin e djathtë, por në masë të madhe në të gjithë banorët e Durrësit, të cilët kërkojnë me patjetër të çlirohen nga pengmarrja “Dako”.
A nuk kishte një zgjidhje më të mirë (përveç tuajës), në Durrës, sesa “importimi” i një kandidature si ajo e Grida Dumës nga Tirana?
Në Durrës nuk mungojnë figurat, si në gjirin e së djathtës, edhe nga shoqërija civile, por në situatën e krijuar, mendoj se kandidatura e znj. Duma është absolutisht më e mira. Kjo për faktin se ajo është një figurë shumë e njohur e PD-së dhe si pasojë do të sjelli bashkimin e të gjithë faktorëve brenda saj, përveç kësaj ajo është një vajzë durrsake dhe jo “importi”. Familja e znj. Duma është një nga familjet më të vjetra dhe të njohura të Durrësit, krahasuar kjo edhe me kundështarin politik. Unë mendoj se të qënit grua, si dhe ndikimi familjar, do të bëjë që ajo të ketë një përkrahje masive nga gjinia femërore dhe shtresa gri, si edhe një sasi të konsiderueshme votash të majta anti-Dako.
Ka shumë fjalë dhe zëra në lidhje me shkallën e impenjimit tuaj dhe të përkrahësve tuaj, në fushatën e opozitës në Durrës. Si qëndron e vërteta?
Nuk besoj që mund të ketë zëra të tillë të paktën në Durrës e në zonën përrreth ku më njohin familjarisht. Unë kurrë dhe për asnjë rrethanë nuk mund të bëj “sikur”, unë jam i sinqertë dhe i drejtpërdrejtë, megjithatë për të zhdukur çdo ekuivok po i përgjigjem pyetjes tuaj në ligjeratë të drejtë: Unë do luftoj e do gëzohem njëlloj me fitoren e bashkisë, sa edhe znj. Duma.
A është e saktë të thuhet se me kaosin që u prodhua në Durrës, janë ulur disi shanset për ta fituar bashkinë?
Nuk ka kaos, por pati njëfarë ç’orientimi ditët e para, gjë e cila tashmë ka kaluar, pasi të gjithë krerët lokalë të PD-së dhe PR-së, si edhe deputetët e Durrësit, janë të angazhuar në fushatë, e cila tashmë ka filluar dhe në ditët në vijim do të intensifikohet.
Opozita, më saktë PD, ka preferuar të shkojë thuajse e vetme në zgjedhje. Si e shihni këtë vendim të sajën?
Nuk është moment ideal që të përcillen partitë e vogla një muaj para zgjedhjeve. Unë nuk kam qenë në brendësi të negociatave, por mendoj se PD-ja në ndonjë rast duhet të ishte treguar më tolerante. Natyrisht aleanca e madhe ka premisë më shumë për fitore, por kur këto aleanca shkelin çdo parim dhe ideologji mund të vërtetohet edhe e kundërta.
Sa e saktë është që zoti Berisha ka pasur rol vemdimtar në spostimin e emrit tuaj nga lista e kandidaturave për Durrësin?
Berisha para disa ditësh tha që “nuk kam ndikuar për kandidimin e Dukës në Durrës”. Jam i prirur ta besoj, por sidoqë të këtë ndodhur , sipas situatës që po shohim, rezulton të ketë qenë një zgjedhje inteligjente.
Çfarë peshe do të kishte për opozitën, një humbje eventuale në Durrës?
Unë mendoj që fitorja e çdo bashkie ka rëndesinë e vet, por në Durrës, duke qenë se që nga viti 2000 qeveris e majta, fitorja merr një rëndësi të veçantë.
Më shumë se çdo qytet tjetër, Durresi ka nevojë të çlirohet nga pengmarrja e betonit dhe të marrë frymë lirisht, prandaj fitorja e Durrësit do ketë aromë lirie. Në Durrës, përveçse do fitojë znj. Duma, do të çlirohen qytetarët. Sa për humbjen, as që e mendoj.
