Filmi kosovar Agnus Dei me skenar dhe regji të Agim Sopit, është shpallur Filmi më i mirë ndërkombëtar /Best International Feature Film/ në Hollywood Verge Film Festival, i cili ka përfunduar të dielën mbrëma në Burbank të Kalifornisë.
Agnus Dei ka fituar edhe çmimin për Fotografinë më të mirë /Best Cinematography/, i cili shkon për drejtorin e fotografisë z. Menduh Nushi, transmeton Koha.net. Filmi vendor më i miri në këtë festival është shpallur Driving While Beck i regjisorit Paul Sapiano, kurse çmimin për aktorin më të mirë e ka fituar Edmund Kingsley.
Pas një turneu të gjatë nga më shumë se 70 vende të botës dhe nga më shumë se 150 festivale, Agnus Dei, këto ditë rikthehet si premierë edhe në rajon, saktësisht në Mal të Zi. Me organizimin e KIC dhe Ministrisë së Kulturës së Malit të Zi, filmi Agnus Dei do ta ketë premieren në Podgoricë ditën e premte me 25 mars.
Agnus Dei, me datë një prill do të hap festivalin Reykjavik International Film Festival, me date 7 prill do të shfaqet në Los Angeles Internatinal Film Festival, kurse me 9 prill në Singapore World Film Festival – Singapore, për të vazhduar i nominuar si filmi më i mirë në Philadelphia International Film Festival që do të mbahet në fund të muajit prill në USA.
