Filmi kosovar “Agnus Dei” me skenar e regji të Agim Sopit, bashkëprodhim i AS Film Production dhe Qendrës Kinematografike të Kosovës, ka fituar edhe dy çmime kryesore ndërkombëtare.
Nga një konkurrencë më me shumë se 5000 tituj nga e gjithë bota, në programin zyrtar të Hong Kong World International Film Festival kanë konkurruar 28 filma të përzgjedhur të metrazhit të plotë në mesin e të cilëve dy filma kosovar /Heroi me regji të Luan Kryeziut, dhe Agnus Dei me regji të Agim Sopit, bëhet e ditur përmes një komunikate për media.
Filmi Agnus Dei ka fituar çmimin kryesor të Festivalit – Oëerall Grand Jury Prize. Çmimin për filmin më të mire të metrazhit të plotë e ka fituar film Stolen Path i regjisorit John Banovich, filmi më i mirë dramatik është shpallur filmi kanadez Black Mud me regjisor Adriano Trapani , kurse për regjinë më të mirë ka fituar filmi rumun Billion Star Hotel me regji të Alecs Năstoiu. Vlen të përmendet se të gjithë këta filma, janë fitues të shumëfishtë të festivaleve të ndryshme ndërkombëtare.
Agnus Dei, poashtu është shpallur si Filmi më i mirë i metrazhit të plotë /Best Feature Film/ në International New York Film Festival.
Festivali prestigjioz i New Yorkut, është unikal për nga forma dhe vlerësimet kinematografike. Është një festival që mbahet gjatë 11 muajve të vitit dhe shfaq në konkurrencë zyrtare nga gjashtë filma për çdo javë, që i bie 264 filma në vit.
Gjatë muajit nëntor, saktësisht nga data 11 – 13 nëntor, mbahet finalja e madhe e International Neë York Film Festival kur shfaqen filmat fitues të vitit dhe ndahen çmimet në secilën kategori.
Festivali mbahet në Sonnet Theater që është pjesë e qendrës së njohur ‘The Producer’s Club’ në zemër të Manhattan-it. Fitues në kategorinë e filmit të metrazhit të gjatë artistik në edicioni e këtij viti, janë: Holey Matrimony – USA, Love Letters are Ridiculous – Brazil, dhe Agnus Dei – Kosovë, citohet Koha.
Me këto dy çmime të para, filmi Agnus Dei, radhit pas vetes 77 çmime ndërkombëtare duke qenë pjesë e më shumë se 160 festivaleve ndërkombëtare. Gjatë muajve në vijim, ‘Agnus Dei’ do të vazhdoj rrugëtimin edhe nëpër disa evente të ndryshme ndërkombëtare. (b.an)
