Agjencia e Trajtimit të Pronës ka përfunduar shqyrtimin e dosjeve për 139 pronarë, toka e të cilëve është e zënë me ndërtime të paligjdhme. “ATP njofton se, më datë 01.07.2016, ka përfunduar procesi i shqyrtimit të disa kërkesave të pronarëve, pasuria e të cilëve është prekur nga ndërtimet informale dhe që deri më tani përfitojnë kompensimin/ shpërblimin e saj deri në masën 70% të shumës së përgjithshme në të holla, të miratuar me Vendimet përkatëse të Këshillit të Ministrave”, thuhet në deklaratën për mediat.
Pas publikimit të listës do të vijohet me procedurën e kalimit të parave në llogaritë bankare. “Procesi i shqyrtimit të këtyre kërkesave dhe i shpërndarjes së fondit të kompensimit është bazuar në ligjin nr.9482, datë 03.04.2006 “Për legalizirnin, urbanizimin dhe integrimin e ndërtimeve pa leje”, i ndryshuar, në Vendimin e Këshillit të Ministrave nr.383, datë 19.05.2010 “Për përcaktimin e procedurave të shpërndarjes së fondit të kompensimit në vlerë për pronarët e pasurive të paluajtshme, pronë private, që preken nga ndërtimet informale”, i ndryshuar, dhe në vendimet përkatëse të Këshillit të Ministrave, në të cilët është përcaktuar masa e shpërblimit për secilin pronar” saktësohet në deklaratën e ATP-së. Sipas këtij vendimi janë 98 kërkesa të depozituara në Agjencinë e Trajtimit të Pronës që kanë marrë këstin e parë, të dytë, të tretë, të katërt dhe të pestë. Në këtë mënyrë 98 personat kanë marrë 70 për qind të vlerës totale të miratuar me Vendimin e Këshillit të Ministrave.
Në vendimin e marrë dje rezulton se janë dhe 41 kërkesa të depozituara në Agjencinë e Trajtimit të Pronës që marrin këstin e pestë në total 13% të vlerës totale të miratuar me VKM-të përkatëse. Për të 139 subjektet do të jepen 144 milionë lekë. Agjencia e Trajtimit të Pronës njofton subjektet e interesuara se vlerat përkatëse për secilin përfitues do të jenë disponibël në llogaritë e tyre bankare në ditët në vazhdim.
Ndërkohë nuk u është kërkuar të paraqesin dokumentet shtesë. Vendimi i marrë nga ATP vjen vetëm dy ditë nga ndryshimi i procedurave që do të ndiqen për legalizimin e ndërtimeve informale si dhe për kompensimin e ish-pronarëve. Procesi i kompensimit të përfituesve ka nisur me paraqitjen e dokumeenteve si “Kërkesën për kompensimin e pronës sipas formatit tip; Dëshminë e trashëgimisë për të gjithë trashëgimtarët e ligjshëm të subjektit përfitues, sipas radhës së trashëgimtarëve; Prokurën e posaçme, të nënshkruar nga të gjitha subjektet që përfitojnë kompensim, ku si tagër i nevojshëm të jetë edhe e drejta për të tërhequr vlerën financiare, në emër të tyre;
Vërtetimin e lëshuar nga banka e nivelit të dytë për hapjen e llogarisë bankare në emër dhe për llogari të subjektit përfitues, ku përcaktohet edhe numri i llogarisë bankare ku do të transferohet vlera financiare e përfituar; Fotokopjen e dokumentit të identifikimit, si dhe certifikatën familjare të kërkuesit; Mandatpagesën”. Pas kësaj ATP bashkëpunon me ALUIZNI- n dhe zyrat vendore të regjistrimit të pasurive të paluajtshme për verifikimin e konfirmimin e të dhënave për subjektet përfituese.
Grupi i punës, brenda 45 ditëve nga përfundimi i afatit për paraqitjen e kërkesës për kompensimin e pronës, vrifikon legjitimimin e kërkuesit për çdo kërkesë për kompensimin e pronës; Kontrollon dokumentacionin e paraqitur nga subjekti përfitues; Konfirmon të dhëna të tjera të nevojshme pranë institucioneve përkatëse. Në përfundim Drejtori i Përgjithshëm i ATP-së, në përfundim të procesit të verifikimit nga grupi i punës nxjerr vendimin për miratimin e listës së subjekteve që kompensohen si dhe publikohet lista e familjeve që u kalojnë paratë.
Procedura e re e legalizimeve
Qeveria ka rishikuar procedurat e legalizimit dhe hipotekimit të ndërtimeve në zonën informale. Tashmë do të jetë ALUIZNI që do të dërgojë në ZRPP-të përkatëse dosjet e banesave që u miratohen lejet e legalizimeve. Ndërsa 10 ditë nga marrja e dosjeve, hipotekat nisin procesin e regjistrimit. Teksa ndërtuesi do të njoftohet për detyrimin financiar. Menjëherë sapo subjekti plotëson këtë detyrim, kopja e pagesës i dorëzohet ALUIZNIT dhe ZRPP-së. Në këtë rast brenda 5 ditëve nga pagesa objekti do të regjistrohet duke i dhënë dhe certifikatën. Në rast se prona ka mbivendosje, atëherë do të pritet vendimi përfundimtar i gjykatës. Kjo edhe përsa i përket kompensimit të pronarëve.
ma.me
