Ndonëse është në arrati dhe me një urdhër arresti nga pas, Agim Kajmaku kërkon lirinë. Kajmaku me anë të avokatëve të tij, ka vendosur që të apelojë vendimin e gjykatës për arrestimin e tij.
Ish-kreu i bashkisë Vorë i shkarkuar nga KQZ pasi shkeli ligjin e dekriminalizimit ka apeluar masën e sigurisë “arrest me burg” të vendosur nga gjykata.
Masa u dha në mungesë, ndërsa policia vijon ende kërkimet për gjetjen e ish-zyrtarit socialist.
Ndërkohë Prokuroria ka sekuestruar celularin e nënkryetarit të Bashkisë së Vorës, Gentian Picari.
Picari është emëruar në postin e nënkryetarit nga Agim Kajmaku, pasi ky i fundit u shkarkua nga KQZ si kryetar i Bashkisë së Vorës, për shkak se u vërtetuan akuzat e opozitës, se ai ka qenë i arrestuar dhe dënuar në Greqi për falsifikim parash.
Agim Kajmaku është shpallur në kërkim prej disa ditësh, por nuk dihet vendndodhja e tij.
Pas shkarkimit nga KQZ, u zbulua se Kajmaku kishte firmosur shkarkimin e dy nënkryetarëve të rinj të bashkisë, duke emëruar në këtë post vetëm Gentian Picarin. Ky i fundit ka bërë kërkesë që t’i rikthehet telefoni.
g.kosovari
