Afera e naftës 'virgin', arrestohet në Frankfurt biznesmeni Ardian Xhillari

Ditën kur prokuroria e Tiranës çoi për gjykim dosjen lidhur me skandalin e naftës Virgin, është arrestuar biznesmeni shqiptar Ardian Xhillari. Ai u prangos në aeroportin e Frankfurtit në Gjermani, pasi ndaj tij ishte lëshuar urdhër ndalimi ndërkombëtar. Ardian Xhillari është pronar I Tea Construction and Petrol, dhe ndaj tij rëndojnë një sërë akuzash për fshehje të ardhurash, mospagim taksash, si dhe pastrim parash. Prokuroria e Tiranës kërkoi 15 vite burg. Nga hetimet rezultoi se ishte shkaktuar një dëm prej 2 milionë eurosh në buxhetin e shtetit. Nga ana tjetër akuza kërkon dhe dënimin me 5 milionë lekë gjobë të kompanisë së tij.

Për çështjen akuzohet edhe ish-nëndrejtoresha e doganave Lula Njebza, e cila sipas Prokurorisë ka shpërdoruar detyrën dhe për këtë duhet t’i hiqet liria për 5 vite.

Xhillari është hetuar në mungesë, pasi prej majit të vitit të kaluar nuk ndodhet në Shqipëri. Sipas prokurorisë Xhillari kishte marrë lejen nga autoritetet doganore për të transportuar naftën “virgin” në pronësi të tij, nga depot e Mëzezit, në Tiranë, për në depot pranë rafinerisë së përpunimit të naftës, në Ballsh. Por, 4.4 milionë litra naftë u shpërndanë nëpër pika karburanti në qytete të ndryshme të Shqipërisë, duke u shitur në treg të lirë.

Lista e çështjeve penale në ngarkim të Xhillarit siguruar nga prokuroria:

1. Deklarimin Fajtor të të pandehurit Ardian Xhillari për veprën penale “Fshehja e të ardhurave” të parashikuar nga neni 180/3, dhe dënimin e tij me 7 (shtate) vite burgim;

2. Deklarimin Fajtor të të pandehurit Ardian Xhillari për veprën penale “Mospagimi i Taksave” të parashikuar nga neni 181 i Kodit Penal dhe dënimine tij me 2(dy) vite burgim;

3. Deklarimin fajtor të të pandehurit Ardian Xhillari për veprën penale “Pastrimi i produkteve të veprës penale ose veprimtarisë kriminale” të parashikuar nga neni 287/3 të Kodit Penal, dhe dënimin e tij me 15(pesembedhjete) vite burgim;

4. Në zbatim të nenit 40 të Kodit Penal heqjen e së drejtës të ushtrimit të detyrave drejtuese për një periudhë prej 10(dhjete) vitesh për të pandehurin Ardian Xhillari;

5. Në zbatim të nenit 55 paragrafi 3 të Kodit Penal, dënimin përfundimtar me 15(pesëmbëdhjetë)vite burgim;

6. Deklarimin fajtor të pandehurit Tea Construction & Petrol për veprëat penale “Fshehje e të ardhurave” “Mospagim i taksave dhe i tatimeve” dhe “Pastrim i Prdokuteve të veprës penale dhe dënimin e tij gjobë në masën 5.000.000(pese milion) lekë.

7. Deklarimin Fajtor të të pandehurës Lula Njebza për veprën penale të “Shpërdorimit të Detyrës” kryer në bashkëpunim, parashikuar nga neni 248 e 25 i Kodit Penal dhe dënimin e saj me 5(pese) vite burgim;

8. Në zbatim të nenit 35 të Kodit Penal heqjen e së drejtës për të ushtruar funksione publike për një periudhë prej 5(pesë) vitesh, për të pandehurën Lula Njebza;

9. Deklarimin Fajtor të të pandehurit Mirarbër Teneqexhiu për veprën penale të “Shpërdorimit të Detyrës” kryer në bashkëpunim, parashikuar nga neni 248 e 25 i Kodit Penal dhe dënimin e tij j me 3(tre) vite burgim;

10. Në zbatim të nenit 35 të Kodit Penal heqjen e së drejtës për të ushtruar funksione publike për një periudhë prej 3(tre) vitesh, për të pandehurin Mirarbër Teneqexhiu.