Shtëpia e Bardhë nuk bën hap pas! Këshilltarët e Presidentit të Shteteve të Bashkuara, Donald Trump, thonë se nuk dekurajohen nga vendimi i gjykatës që shpalli të paligjshme shumë nga tarifat e vëna prej tij, raporton The Guardian.
Gjykata e Lartë amerikane vendosi më 29 maj, të bllokojë tarifat e Trump, me argumentin se Kreu i Shtëpisë së Bardhë ka shkuar përtej autoritetit të tij.
Urdhri i gjykatës është i përhershëm, duke i ndaluar kështu tarifat globale të Trump-it, deri sa të arrihen marrëveshjet me shumicën e partnerëve tregtarë. Brenda dhjetë ditësh, administrata e Trump është e detyruar të zbatojë vendimin e gjykatës. Në rast se ky vendim mbështetet dhe nga shkalla e Apelit, e nga Gjykata Supreme, Trump nuk do të ketë të drejtë me aplikimin e tarifave.
Ky vendim është një goditje e madhe ndaj politikave të presidentit amerikan. Sakaq, Shtëpia e Bardhë e apeloi edhe më herët vendimin e kësaj gjykate, duke u shprehur se “Nuk është detyrë e gjyqtarëve të pazgjedhur të vendosin si të adresojnë siç duhet një emergjencë kombëtare.”
Sipas tyre, gjyqtarët po kërcënojnë besueshmërinë e Shteteve të Bashkuara në skenën botërore, ndaj Gjykata e Lartë duhet t’i japë fund kësaj për hir të Kushtetutës.
Edhe Gjykata Amerikane e Tregtisë Ndërkombëtare, vendosi se Trump nuk kishte autoritetin sipas Aktit Ndërkombëtar të Fuqive Ekonomike të Emergjencës për të vendosur tarifa gjithëpërfshirëse për mallrat që importohen në SHBA.
