Gjashtë zyrtarë publikë në Elbasan janë vendosur nën masa sigurie me kërkesë të Prokurorisë, pasi dyshohet se janë të përfshirë në një skemë abuzimi me fondet e ndihmës ekonomike. Sipas hetimeve paraprake, nga kjo skemë i është shkaktuar shtetit një dëm prej rreth 12.5 milionë lekësh të reja.
Gjykata ka vendosur ndaj tyre masat “detyrim për t’u paraqitur në policinë gjyqësore” dhe “pezullim nga ushtrimi i detyrës”. Të gjashtë të dyshuarit mbanin funksione të ndryshme, si administratorë shoqërorë, postierë, drejtues drejtorie në bashki dhe specialistë në nivel rajonal. Ata akuzohen për veprat penale “shpërdorim detyre”, “vjedhje duke shpërdoruar detyrën”, “falsifikim dokumentesh” dhe “hyrje të paautorizuar në sistemet kompjuterike”.
Hetimet kanë nisur pas një kallëzimi të bërë nga një qytetar në prill 2025, i cili ka ngritur dyshime për parregullsi në shpërndarjen e ndihmës ekonomike. Verifikimet kanë zbuluar se në një njësi administrative të qarkut Elbasan janë përfshirë në skemë edhe familje që nuk plotësonin kriteret ligjore për përfitim.
Sipas Prokurorisë, të dyshuarit kanë bashkëpunuar për të mos administruar dokumentacionin e nevojshëm, për të rritur në mënyrë fiktive numrin e përfituesve dhe për të lejuar shpërndarjen e padrejtë të fondeve publike.
