Një ngjarje e rëndë që kishte ndodhur në Roskovec u zbulua të shtunën nga Policia, kur njoftoi se kishte arrestuar një 56-vjeçar për abuzim seksual.
I arrestuari është Petrit Arapi dhe dyshohet se ka kryer marrëdhënie seksuale me një 20-vjeçare, e cila është me aftësi të kufizuara. Pas ekzaminimeve të kryera, ka rezultuar se e dëmtuara është shtatzënë. Arapi është arrestuar nga Policia e Fierit dhe do të akuzohet për veprën penale “Marrëdhënie seksuale ose homoseksuale me persona të pazotë për t’u mbrojtur”.
Ndërkohë, bashkëshortja e të arrestuarit ka mohuar ngjarjen për gazetarët e “Top Channel”, madje është revoltuar në momentin që e kanë pyetur rreth akuzave të ngritura ndaj të shoqit nga Policia. Ngjarja është denoncuar në Policinë e Fierit nga familjarët e vajzës së dëmtuar, të cilët kanë përmendur emrin e personit të arrestuar, duke e akuzuar se ka abuzuar me 20-vjeçaren. Ndërsa vetë 56-vjeçari i arrestuar mësohet se ka mbajtur qëndrim mohues, duke pretenduar se një gjë e tillë nuk është e vërtetë.
FSHATI KU NDODHI NGJARJA
Fshati Ngjeqar i Fierit u trondit të shtunën me arrestimin e një banori të tij, pasi akuzohet se ka përdhunuar një 20-vjeçare me aftësi të kufizuara. Fshati është drejt boshatisjes dhe ndaj gjen pak banorë për të zbardhur ngjarjen e rëndë të abuzimit. Sipas Policisë së Fierit, është arrestuar shtetasi Petrit Arapi, 56 vjeç, për veprën penale “Marrëdhënie seksuale ose homoseksuale me persona të pazotë për t’u mbrojtur”.
Burimet kanë treguar për “Top Channel” se familja e 56-vjeçarit jeton në fshatin Ngjeqar dhe banorët e njohin si njeri të mirë. Ndërsa 20-vjeçaren, me të cilën dyshohet se ka abuzuar seksualisht i arrestuari, nuk e identifikoi njeri dot as në lagje dhe as nga infermierja e fshatit, Evjola Stani, e cila shprehet se ditët e fundit nuk ka pasur asnjë person të pazotë, aq më pak 20- vjeçare, të paraqitet për ekzaminime në këtë qendër shëndetësore pasi ka rezultuar shtatzënë. Ndërsa bashkëshortja e autorit të dyshuar e mori vesh ngjarjen nga media, pasi i ishte thënë që është arrestuar për drogë.
“Unë nuk di gjë me të keqen, se qysh ma kanë marrë atë burrë, po rroptohet në punën e tij. E mbjell tjetri, ia hedh tjetrit kot”, shprehet e shoqja për “Top Channel”, duke pretenduar se të shoqin e kanë arrestuar për drogë. Ndërsa kur i përmendin arsyen se përse e ka prangosur Policia, ajo irritohet: “Jo, jo, jo… për atë punë mi? Moj jeni në terezi juve apo jo? Qysh mi burri im paska abuzu… çfarë thoni kështu? E ka thënë Policia?!”. Në lidhje me ngjarjen e rëndë tashmë është ngritur edhe një grup hetimor për verifikime të mëtejshme.
/b.h
