Kryetari i Bashkisë së Rrogozhinës, Beqir Nuredini ka reaguar për herë të parë pas akuzave të ngritura nga Prokuroria për abuzim me pronat në bregdetin e Spillesë në Kavajë. Me kërkesë të Prokurorisë, Gjykata e Kavajës i bllokoi pasaportën Nuredinit duke mos i lejuar kështu të dalë jashtë vendit si dhe u la në detyrim paraqitje.
Në reagimin e tij kryebashkiaku Nuredini shprehet se distancohet nga akuzat në adresë të tij, por është i gatshëm për t’u hetuar nga organet ligjzbatuese. Ai sqaron se për dokumentet e falsifikuara të zbuluara nga Prokuroria, ka qenë i cili ka bërë denoncim në Prokurori. “Duke marrë shkas nga çështjet e ngritura nga Prokuroria, si Kryetar i Bashkisë Rrogozhinë, mbështes hetimet dhe vënien para përgjegjësisë së autorëve. Unë si Kryetar Bashkie Rrogozhinë, kam zbatur procedurën që parashikon ligji për përcelljen e praktikave për regjistrim fillestar të pronave, të aplikuara nga banorët e zonës. Distancohem nga çdo akuzë që është bërë.
Nga hetimet e Prokurorisë jam njohur me disa dokumenta, të cilat ishin te falsifikuara. Për këto falsifikime unë kam bërë denoncim në organet përkatëse. Masa ‘Detyrim Parqitje’, e caktuar nga Gjykata, për mua ishte e papritur. Kjo për shkak se unë kam qënë gjithmonë i gatshëm gjatë hetimeve dhe kam vënë në dispozicjon të Prokurorisë çdo dokument dhe dëshmi që më është kërkuar. Gjithesi mbeten i hapur për çdo hetim.
Falë ndërhyrjeve të bëra nga Bashkia Rrogozhinë, Plazhi i Spillesë është kthyer në një ndër destinacionet më të rëndësishme turistike në vend. Kjo vërtetohet edhe nga frekuentimi që është bërë nga qytetarët përgjatë 2017-së. Nga një rrënojë, Plazhi i Spillesë është kthyer ndër plazhet më të kërkuara nga shqiptarë dhe të huaj. Janë më shumë se 20 mijë pushues në vit, që frekuentojnë Plazhin e Spillesë, falë këtyre ndërhyrjeve të bëra në 2 vitet e fundit”.
