Pavarësisht abstenimit të ministrit të vetëm serb Nenad Rashiç, Qeveria e Kosovës gjatë mbledhjes të së mërkurës mori vendim për themelimin e Muzeut të Gjenocidit dhe Përpjekjes për Liri.
Muzeu i gjenocidit ka për synim dokumentimin dhe prezantimin e krimeve të ish-Jugosllavisë dhe të Serbisë ndaj shqiptarëve dhe të tjerëve në Kosovë.
“Vendi ynë do të ketë një muze të dinjitetshëm ku do të tregohen krimet e ish-Jugosllavisë dhe të Serbisë ndaj popullit tonë. Ky muze është institucionalizimi i memories sonë kolektive dhe dëshmi sa e krimeve monstruoze të Serbisë gjenocidale aq edhe dëshmi se Republika e Kosovës edhe ka ngadhënjyer edhe nuk harron”, u shpreh kryeministri Kurti.
Muzeu fillimisht do të themelohet si njësi e veçantë në kuadër të Muzeut Kombëtar të Kosovës ndërsa menjëherë pas hyrjes në fuqi të ligjit për muzetë që aktualisht është në proces të hartimit ky institucion do të ngrihet në nivel institucional muzeal të nivelit kombëtar.
Pjesë e saj do të bëhen edhe të gjithë muzetë e vegjël që janë ngritur në forma të ndryshme në të gjithë qytetet e Kosovës e që dëshmojnë historinë krimeve të luftës.
“Janë disa muze të vegjël në të gjithë Kosovën që dokumentojnë këto krime nga e kaluara dhe ne besojmë që mënyra më e mirë është që të gjitha këtë të bëhen pjesë e këtij institucioni të ri muzeal të Kosovës”, tha ministri Çeku.
I pyetur nga A2 CNN rreth abstenimit të ministrit Rashiç, Çeku deklaroi se “historinë do ta tregojmë ashtu siç është” dhe se muzeu do të dëshmojë edhe për krimet serbe ndaj etniteteve të tjera në Kosovë.
“Pika ku pajtohemi të gjithë është që e kaluara jonë është ajo që është dhe detyra jonë është që ta tregojmë ashtu siç është. Në vendimin përfundimtar për themelimin e muzeut tashmë thuhet dokumentimi dhe prezantimi i krimeve të ish-Jugosllavisë dhe të Serbsië ndaj shqiptarëve dhe të tjerëve në Kosovë”, shtoi Çeku.
A2 CNN kontaktoi ministrin Rashiç për ta pyetur se ku janë rezervat e tij ndaj muzeut dhe ai konfirmoi se ka të bëjë me “gjeneralizimin e gjenocidit”.
“Konsideroj se çdo krim ka emër dhe mbiemër dhe nuk duhet të gjeneralizohen krimet sikur në këtë pikë. Do të thotë, emri i muzeut nuk është adekuat, ‘Gjenocidi i Serbisë dhe i Jugosllavisë’. Mund të jetë për shembull ‘Gjenocid lufte’, ‘gjenocid nga kriminelët e luftës’, ‘gjenocide të grupeve paramilitare’, ‘krime lufte’ ose ndonjë shprehje tjetër por jo të përdoret shteti i tërë sikur të jetë gjenocidal”, tha ministri serb Rashiç.
Muzeu i Gjenocidit do të vendoset në objektin aktual të Ministrisë së Kulturës në sheshin kryesor në Prishtinë, ndërsa ministria do të zhvendoset dikur tjetër.
Pas vendimi qeveritar për themelim, Ministria e Kulturës tash hap procedurat për hartimin e konceptit muzeal si fazë e parë e procesit, ndërsa nuk u dha datë se kur pritet funksionalizimi i tij.
