Aleanca për Ardhmërinë e Kosovës i cilësoi arrestimet e deputetit Glauk Konjufca dhe zëdhënësit të Vetëvendosjes Frashër Krasniqit të lidhura me protestën e nesërme të opozitës në Prishtinë.
“Arrestimi mbrëmë i zëdhënësit të LVV-së, Frashër Krasniqi dhe sot i shefit të Grupit Parlamentar të kësaj partie, si dhe paralajmërimet për arrestime të tjera të mundshme të aktivistëve të VV-së, për siç thuhet disa vepra të kryera shumë vite më parë, pikërisht një ditë para protestës së madhe të opozitës në Prishtinë, dëshmon lidhjen e fortë të pushtetit dhe gjyqësorit”, thuhet në një deklaratë të AAK-së.
Sipas deklaratës së dërguar, nuk mund të jetë krejt e rastësishme që pushteti vendosë ta ushtrojë zbatimin e ligjit në ditën më domethënëse për opozitën
“Opozita është shumë herë më përgjegjëshme dhe nuk do t’i nënshtrohet skenarëve të krerëve të pushtetit për një protestë të dhunshme, edhe ashtu të paralajmëruar, të sajuar e të deklaruar publikisht prej disa ditësh”, thuhet në deklaratë.
AAk bën të ditur se protesta e 17 Shkurtit do të jetë qytetare dhe paqësore.
