Ministrja e Shëndetësisë, Ogerta Manastirliu ka folur në lidhje me Kuvendin e 11 dhjetorit, të mbajtur nga Sali Berisha, për shkak se u shkelën masat anti-COVID, tha se nuk ka dijeni lidhur me këtë rast.
E ftuar në Radari Informativ, Manastirliu u shpreh se duhen pyetur organet ligjzbatuese, ndërsa shtoi se aktivitetet e partive s’mund të prevalojnë ndaj misionit për të mbrojtur qytetarin nga COVID.
“Unë nuk i shikoj aktivitetet me parti, por i shikoj sa këto aktivitete zbatojnë rregullat anti-COVID, për këtë ministria e Shëndetësisë i përkthen në vendime dhe urdhra. Nëse jeni të interesuar mund të evidentoni me qindra raste që janë marrë masat andiminstrative. Sa i përket Kuvendit të 11 dhjetorit duhet të pyesim organet ligjzbatuese, unë nuk ndjek aktivitetet. Aktivitetet e partive s’mund të prevalojnë ndaj misionit që ne kemi për të mbrojtur qytetarin”, tha ministrja.
Njoftime se mashtruesit po e shfrytëzojnë fushatën globale të vaksinimit për të hedhur në treg certifikata të falsifikuara vijojnë të rriten. Ministrja tha se edhe në vendin tonë ka pasur raste dhe se personat që e kanë bërë një gjë të tillë kanë marrë ndëshkimin e merituar. Ajo bëri apel që të denoncohen sa më shumë raste të tilla.
“Nuk mund të them që është një problem që haset shpesh por ka pasur raste ka pasur denoncnime për raste të abuzimit në këtë drejtim, që jo vetëm është marrë masa e janë përjashtuar nga detyra por edhe të ndiqen raste të tilla. Duhet të kemi parasysh se të gjithë duhet të jemi prezentë dhe përfaqësues të asaj që ndodh dhe çdo qytetar çdo mjek çdo punonjës ka detyrën të raportojë dhe të denoncojë në kohë reale”, u shpreh Manastirliu.
/b.h
