Kryetari i Partisë Mundësia, Agron Shehaj i pyetur nëse rrezikon mandati i tij si deputet në qarkun e Tiranës, pas vendimit për rinumërimin e votave në këtë qark, shprehet se çdo gjë është e mundur në Shqipëri.
I ftuar në studion e emisionit “Opinion” në Tv Klan, Shehaj shprehet se është pro rinumërimit dhe se sipas tij, fatmirësisht posedojnë filmimet e numërimit dhe nuk mund të ketë manipulime.
Blendi Fevziu: Shehaj je dakord me rinumërimin? Mund të rrezikohet mandati juaj?
Agron Shehaj: Pse të mos rinumërohen. Çdo gjë është e mundur, sidomos në Shqipëri. Për fat të mirë kemi filmimet, skandalizimet e para. Nëse ka pasur manipulime, e përsëris në Shqipëri mund të ndodhë gjithçka. Votat nuk i ka numëruar Partia Mundësia, i kanë numëruar numëruesit e Partisë Socialiste dhe numëruesit e Partisë Demokratike. Tani që janë bërë lëmsh me votat e kandidatëve është e qartë. Aty do të ketë çudira. Kurse vëmendja për numërimin e votave të partive politike ka qenë shumë e madhe, kanë qenë gjithë të përqëndruar.
Ndërkohë sa i takon asaj nëse është i kënaqur apo jo me rezultatin e zgjedhjeve Shehaj shprehet se rezultati është inkurajues, por me pritshmëritë që ata kishin synonin një grup parlamentar.
Blendi Fevziu: Shehaj se s’të kam pasur më pas zgjedhjeve, je i kënaqur me rezultatin?
Agron Shehaj: Tani nëse e krahasojmë me pritshmëritë e të tjerëve, që votat për partinë Mundësia do të shkonin dëm, rezultati është inkurajues. Nëse e krahasojmë me pritshmëritë që kishim ne, sigurisht ne synonim që do të kishte qenë një rezultat shumë i mirë që të kishim një grup parlamentar.
Shehaj thekson se “Mundësia” ka marrë më shumë vota nga zonat urbane, teksa këtë e lidhi me faktin se vizioni i tyre ishte më i ndërlikuar dhe kjo ndoshta mesazhi i tyre nuk ka arritur dot në këto zona rurale.
“Ne kemi marrë vota kryesisht në zonat urbane në qendrat e qyteteve, në Vlorë, Durrës dhe Fier. Është një përqindje e jashtëzakonshme duke qenë një forcë politike e re. Në zonat rurale nuk jemi fare mirë. Ne ishim e vetmja forcë politike që kishim një mesazh të qartë. Nuk bëmë pazare me askënd, as në distancë. Ne kemi folur për një vizion. Ishte pak më e ndërlikuar të përqafoje vizionin tonë. Mbase në zonat rurale ky mesazhi ynë nuk ka pasur mundësi të shkojë. Ajo që është shumë e rëndësishme për ne është fakti që votues më të thelluar kanë përqafuar vizionin tonë”, shprehet Shehaj.
