Ish-deputeti i PD, Edmond Spaho ka reaguar ashpër në një postim në Facebook ndaj qëndrimeve të Partisë Demokratike për protestën dhe investimin në Zvërnec.
Spaho thotë se PD është e pamoralshme dhe e pafytyrë sepse në mëngjes e mbështet investimin, kurse në drekë del kundër, duke iu referuar ndryshimit të qëndrimit të Sali Berishës sot.
Postimi i Spahos:
A ka turp kjo forcë politike?
Si mund të jesh kaq e pamoralshme dhe e pafytyrë?
Në mëngjes deklarohet kundër protestës dhe pro investimit në Zvërnec.
Në drekë deklarohet pro protestës dhe kundër investimit në Zvërnec.
Ndjen erën e kërmës dhe vrapon për copën e radhës.
Karrigia e pushtetit vlen mbi çdo gjë. Vërtet do ju pranojnë në protestë?
E keni humbur besimin e shqiptarëve dhe jeni katandisur si karavidhe.
Pa parime, pa turp, as skuqeni e as zverdheni, të zezës i thoni e bardhë dhe të bardhës e zezë.
A keni kokë, a keni logjikë, a keni mendje për të menduar, e aftë t’ju mbajë për të mos u turpëruar dhe diskredituar kaq shumë?
Kur flisni marrëzira, a mendoni për sakrificat 35-vjeçare të qindra mijëra demokratëve të cilët ju kanë besuar juve?
Kjo forcë politike e mbylli misionin e saj sepse prej kohësh ka braktisur interesat e qytetarëve dhe është kthyer në barrikadë e interesave të familjes.
Koha, historia dhe njerëzit po ju hedhin në kosh të plehrave, duke ju zëruar edhe ato të mira që keni bërë për vendin që nga themelimi i PD.
Sa keq! Sa turp!
