Takimi i parë nuk solli rezultate, vetëm sa e përkeqësoi situatën, Jorge Mendes do të takohet me zyrtarë të Real Madridit edhe njëherë gjatë ditës së sotme.
Jorge Mendes, agjenti i Cristiano Ronaldos, do të takohet sërish sot (enjte) me drejtuesit e Real Madridit, për të diskutuar të ardhmen e portugezit, që dëshiron të qartësoi gjithçka para Kupës së Botës.
Mendes u takua me drejtuesit e klubit të martën, por gjërat u përkeqësuan sepse Reali ia bëri të qartë se nuk do të ketë përmirësim drastik të kontratës, raporton Sky Sport.
Ndërsa Edu Aguirre në “El Chiringuito de Jugones” tha se: “Situata mes Ronaldos e Realit është tensionuar, është më keq se kurrë më parë”.
Sipas Edu, e gjithë kjo tollovi e krijuar me CR7 është për shkak të Perezit.
“Fillimisht dua të them se Cristiano dëshiron të vazhdojë me Madridin. E vërteta është se ai është madrilen dhe dëshiron të vazhdojë. Më shumë se kurrë më parë e ndjen përkrahjen nga tifozët, nga shokët e skuadrës”, tha Edu.
“Por, Cristiano Ronaldo është i zhgënjyer me Perezin. Ronaldo ndihet i tradhtuar nga Florentino Perez. Ronaldo mendon se kjo që po ndodh që një kohë është strategji që ai të largohet. Ronaldo ndjen se nuk e duan në Real Madrid. Ronaldo beson se Perez nuk e do në Madrid. Para disa muajsh klubi i ka treguar Ronaldos se janë të lumtur me të, me numrat e tij, me historinë që po shkruan dhe se do ta paguajnë 30 milionë euro”, vijoi Edu.
“Dje, siç tregova pas takimit mes përfaqësuesve të lojtarit dhe atyre të Realit, gjërat janë përkeqësuar”. “Në këtë takim, propozimi i Realit ishte i kundërt. Jo që nuk i afrohet asaj që premtuan, por është vetëm pak më shumë nga ajo që fiton tani”.
“Ronaldo e sheh këtë si mos respekt. Një propozim qesharak, pasi ka dhënë jetën për Real Madridin, ka dhënë gjithçka. Për këtë Ronaldo ndihet dhe është shumë i zhgënjyer sepse mendon se është strategji për ta larguar, mendon se Perez nuk e do në Madrid. Situata është tensionuar, është më keq se kurrë më parë”, shtoi Aguirre, përgatiti “Gazeta Express”. (b.an)
