Kryeministri i Kosovës dhe familja e kërcënuar me jetë! Ky është lajmi që po bën bujë në Kosovë. A është vallë demarkacioni me Malin e Zi dhe Asociacioni serb, që po kërcënojnë? Në Aleancën për Ardhmërinë e Kosovës thonë se nuk ka kërcënime nga kjo parti, por i bëjnë thirrje kryeministrit Mustafa që të reflektojë.
Njohës të çështjeve në vend konsiderojnë se Policia e Kosovës duhet t’i marrë seriozisht deklarimet e kryeministrit, Isa Mustafa, i cili të shtunën në një postim në Facebook, ka thënë se individ apo grupe të caktuara po i kërcënojnë udhëheqësit e shtetit dhe familjet e tyre, madje edhe vetë shtetin. Por, policia e Kosovës thotë se nuk është në dijeni për kërcënimet ndaj Isa Mustafës dhe familjeve të krerëve të shtetit. Madje ajo duket aq konfuze dhe e paqartë, sa mendon se pyetja nuk është për policinë, por për Kryeministrin e vendit.
A është policia edhe në shërbim të kryeministrit të vendit, ndoshta nuk është për ta vënë në dilemë, për një shkarje fjalësh, por krerët e institucioneve të Kosovës sigurohen, (ruhen e mbrohen) nga njësiti i mbrojtjes së afërt, me ndonjë përjashtim të ndonjë pjesëtari, që kryeministri e ka pasur pjesë të sigurisë së tij edhe në detyra të mëhershme, p.sh. si kryetar i Prishtinës.
