Sot është dita e tetë e luftës në Lindjen e Mesme, ndërkohë që pasojat ekonomike që rrjedhin nga sulmet parashikohen të jenë të mëdha.
Ergis Sefa, ekspert ekonomie bëri një analizë të asaj që pritet të ndodhë.
“Jemi ende në situatën e panikut. Duhet të kalojnë disa javë që të kuptojmë efektin në çmimin e naftës dhe gazit natyror. Nëse lufta zgjat edhe 4-5 javë të tjera, do të nisim të ndiejmë efektet në çrregullimin e furnizimit, përveç rritjes së çmimeve”, tha ai.
Ndërkohë, në lidhje me situatën në Shqipëri, ai u shpreh se dy nga arsyet që e përkeqësojnë situatën janë rezervat strategjike dhe fakti që 100 për qind e naftës që përdoret në vendin tonë është e importuar.
“Rezervat strategjike duhet t’i kemi deri në 90 ditë, qoftë nga kompanitë private apo ato shtetërore. Aktori i dytë dhe më i rëndësishëm është se ne importojmë çdo litër naftë që përdorim. Edhe ajo që prodhohet në Ballsh dërgohet jashtë për t’u përpunuar, sepse nuk kemi rafineri funksionale.
Sa kohë që importon 100 për qind të produktit, je i varur nga tregjet ndërkombëtare dhe çmimet nuk mund të amortizohen. Operatorët duhet të reagojnë në momentin që çmimi në bursë stabilizohet në nivele të larta, por duke qenë se ata e shohin tendencën, shpeshherë spekulojnë me çmimet. Shpresoj që të ketë hetim dhe monitorim, madje edhe me prapaveprim për disa vite më pas. Autoriteti i Konkurrencës e ka këtë tagër. Nuk mund që operatorët të vendosin një çmim të ri kur shesin ngarkesën e vjetër, sepse nuk justifikojnë kostot”, tha ai.
