Shqipëria del nga piku i infektimeve nga gripi. Muaji shkurt nis me ulje të sëmundshmërisë nga infeksionet respiratore dhe kryesisht nga nëntipet e gripit A, AH1N1 dhe AH3N2.
Instituti i Shëndetit Publik raporton rënien e kurbës së infektimeve dhe daljen nga zona me intensitet shumë të lartë të qarkullimit të virozave respiratore. Nga qendrat shëndetësore dhe spitalet raportohen një mijë raste më pak se java e fundit e janarit, e cila shënoi kulmin e qarkullimit të gripit me mbi 23 mijë raste në javë.
Edhe pse kemi hyrë në një aktivitet normal të gripit, fëmijët dhe të moshuarit janë grupmoshat më të prekura, shpesh edhe me rikthime të tij apo mbivendosje virozash. Urgjencat dhe shtretërit në spitale vijojnë me kapacitete maksimale për shkak të agresivitetit të gripit sezonal, por edhe komplikacioneve që shkakton te të sëmurët kronikë, deri në intubime.
Tirana është qyteti me qarkullimin më të madh të gripit në këtë periudhë, ndjekur nga Durrësi dhe Gjirokastra.
