Ish-presidentja e Kosovës, Vjosa Osmani, e ftuar në “Inside Albania” në Euronews Albania, ka folur për të ardhmen e saj politike, mundësinë për të marrë drejtimin e LDK-së, por edhe nëse do ta konsideronte postin e kryeministres së Kosovës.
E pyetur nëse drejtimi i LDK-së është ende pjesë e vizionit të saj afatgjatë apo nëse dëshiron t’i rikthehet mësimdhënies, Osmani tha se aktualisht nuk ka një përgjigje përfundimtare.
“Kjo është një pyetje për të cilën nuk kam një përgjigje tani për tani. Duhet ta pranoj, ka pasur kaq shumë raste në jetën time kur kam thënë: Në rregull, politika ka mbaruar për mua. Dua të kthehem te mësimdhënia e kaq. Ndoshta edhe ky është një nga ato momente, por pastaj gjërat thjesht mund të jenë kaq të paparashikueshme në politikën e Kosovës. Sepse kam parë kaq shumë nga këto situata, nuk mund të jap vërtet një përgjigje përfundimtare në këtë pikë. Do të varet nga shumë gjëra”, tha Osmani.
Ajo u shpreh se në këtë moment dëshiron t’i rikthehet mësimdhënies, të kalojë më shumë kohë me familjen, por edhe të vazhdojë angazhimin për kauzat që ka mbështetur gjatë kohës kur ishte presidente.
“Nëse më pyet se çfarë dua të bëj në këtë moment, vërtet dua të kthehem te mësimdhënia dhe të kaloj më shumë kohë me familjen time. Por gjithashtu të angazhohem shumë në disa kauza për të cilat kam punuar si presidente dhe tani si ish-presidente e Kosovës, të vazhdoj me ato kauza”, u shpreh ajo.
Osmani foli edhe për mundësinë që në të ardhmen të kandidojë sërish për postin e kryeministres, duke kujtuar se e kishte konsideruar këtë mundësi në vitin 2019.
“Nuk ka asnjë sfidë nga e cila të kem frikë në këtë pikë të jetës. Duhet të të them, asnjë. Megjithatë nuk e kam parë vërtet, sidomos në dy vitet e fundit. Ka pasur një kohë kur po mendoja për këtë, rreth vitit 2019, kur kandidova edhe për kryeministre. Nuk jam më në atë pikë ku mendoj se kjo është ajo që dua.”
Megjithatë, ajo nuk e përjashtoi përfundimisht një rikthim të tillë në të ardhmen.
“Do të shohim se si do të shkojnë gjërat, nuk është diçka që planifikoj apo dëshiroj në këtë pikë. Por kurrë mos thuaj kurrë. Sigurisht, siç thashë, ka kaq shumë gjëra me të cilat përfundova që nuk po i planifikoja fare. Ndonjëherë është sikur gjërat ndryshojnë ose përmbysen brenda një muaji. Nuk po flas as për vite, por brenda një muaji, ose më pak”, tha Osmani.
