Pas dy dështimeve radhazi, deputetët e rinj të Kuvendit të Kosovës më në fund arritën ta miratojnë raportin për verifikimin e kuorumit dhe mandateve, moment që zhbllokon situatën ndërsa deputetët bënë betimin për mandatin e tyre të ri.
Megjithatë, procesi u ndal kur erdhi radha për zgjedhjen e kryetarit të Kuvendit.
Kandidatura e Albulena Haxhiut, e propozuar nga Lëvizja Vetëvendosje, nuk arriti të sigurojë shumicën e nevojshme në asnjërën nga dy votimet: në të parën Haxhiu mori 57 vota për, 20 kundër dhe 3 abstenime; në të dytën, rezultati ishte thuajse i njëjtë, 57 pro, 19 kundër dhe 3 abstenime. Nisma Socialdemokrate dhe dy deputetë të komuniteteve joserbe abstenuan, duke e pamundësuar zgjedhjen e kryetares së re.
Pas dështimit të votimit, seanca u ndërpre dhe pritet të vazhdojë sot në orën 15:00, me shpresën për një marrëveshje të re politike që do t’i japë Kuvendit udhëheqësinë e nevojshme për të nisur punën.
