Pas dy rasteve të para të grabitjeve të parave të bankave, policia dyshon se punonjësit e shoqërive private të ruajtjes fizike bashkëpunojnë me autorët. Alarmin e dha 6 muaj më parë vet drejtori i Rendit Publik në Policinë e Shtetit, Gjovalin Loka, gjatë një tryeze mbi sfidat e sektorit privat të sigurisë në vend.
“Te grabitja që u bë te Stacioni i Trenit, një ndër punonjësit e policisë figuronte me probleme. Nuk mund të mbajmë në radhët tona dhe në radhët tuaja persona që kanë probleme në vetvete. Janë kontigjentë të krimit, janë të prirur, sepse nuk mund t’ua besosh një shërbim të tillë. Kemi vënë kriter 5 veta të shoqërimit të vlerave monetare; 5 veta kishte dhe përsëri u vodhën lekët. Para disa ditësh, në Qafë Kashar, në mes të ditës e në rrugën nacionale, aty ku çdo 30 sekonda kalon një automjet. Që te përzgjedhja e atij elementi që do të na ofroni si kandidat të mundshëm do të jetë puna juaj, e drejtuesve teknikë, por edhe administratorëve”, tha Gjovalin Loka në mbledhjen e 18 dhjetorit të vitit të kaluar.
Loka fliste për kontigjent kriminal në këto struktura, por mesa duket, kjo nuk mjaftoi për të parandaluar grabitjen spektakolare të radhës në Aeroportin e Rinasit.TCH/a.k
