Kryeministri Edi Rama ndodhet në Elbasan për festën e Ditës së Verës. Në një kohë kur kjo festë nuk po kremtohet si zakonisht për shkak të pandemisë, edhe urimi i kreu të qeverisë ishte që vera të jetë më e lehtësuar sa i përket situatës me koronavirusin.
Gjatë një prononcimi për mediat, Rama tha se qeveria po bën maksimumin për të garantuar vaksinim sa më intensiv. Ai u shpreh se qëllimi është që të realizohet vaksinimi i popullsisë njësoj si shumë vende të tjera të BE-së.
“Unë jam këtu për të respektuar një traditë të kësaj feste që është kthyer në festë kombëtare prej kohësh. Jam këtu për t’i uruar të gjithë pa përjashtim, pa dallim bindjesh politike, pa dallim besimesh apo prejardhjesh që të kenë një festën të gëzuar dhe të kenë një verë të gëzuar. Unë dhe ne po përpiqemi çmos që vera të jetë një verë e lehtësuar nga pesha e rëndë e situatës së imponuar nga armiku i padukshëm. Jemi duke bërë çmos që të garantojmë një vaksinim sa më intensiv duke sjellë sasi të konsiderueshme vaksinash.
Është në rendin e ditës sime sa hap sytë dhe është mendimi i fundit përpara se të fle ato orë të pakta që të garantojmë dozat e konsiderueshme dhe ë vaksinojmë në mënyrë të konsiderueshme që vera të jetë si kjo ditë e bukur dhe që e ardhmja e afërt të jetë e çliruar nga makthi dhe goditjet që virusi bën në familjet e njerëzve tanë dhe deri duke marrë edhe jetë njerëzish. Kjo është arsyeja pse jam këtu dhe kjo është A dhe Zh e ditës sime, të bëjmë këtë verë, një verë sa më të lehtë dhe ta çajmë rrethimin e virusit as më shumë as më pak, por në të njëjtën kohë si në shumë vend të BE-së”, tha Rama.
Kryeministri shoqërohej në Elbasan nga kryebashkiaku Gledian Llatja, ministrja e Arsimit, Evis Kushi dhe Taulant Balla.
/a.r
